21/06/2013 16:57:52

Saranda, në pritje për votimet

Baza materiale është e sistemuar dhe ndarë për të 39 qendrat e votimit të Sarandës

SARANDE - Përgatitjet e fundit po kryhen nga komisionerët e tre KZAZ-ve, nr 87, 88 dhe 89 të qarkut të Vlorës per zonen e Sarandes për një infrastrukturë në standarde për kryerjen e proçesit të votimeve dhe përfundimin e tij. Kryetari i KZAZ nr. 88, Hariz Mema, pohon se gjithë baza materiale është e sistemuar dhe ndarë për të 39 qendrat e votimit të Sarandës.

Pritet zëvendësimi i nënkryetarit të KZAZ-së së dorëhequr Ramis Husi. Në bashkinë e Sarandës janë të afishuar emrat e 32.842 votuesve. Klima e përgatitjeve ndihet dhe në mjediset e shkollës së mesme Ksamil, ku është vendosur Komisioni Zonal nr. 89. Kryetari i KZAZ, Osman Xhaferi, pohon se është sistemuar e gjithë baza materiale për 75 qendrat e votimit. Në 92 fshatrat e kësaj KZAZ-je pritet të votojnë 46 800 votues.

Një risi në proçesin e punës në këtë KZAZ është përfshirja në të edhe e komunës Lukovë, duke shënuar si nëjsi administrative 1 bashki dhe 7 komuna. Pikat më të largëta janë fshatrat Njanjar i komunës Markat, 60 kilometër larg, po 60 kilometër larg edhe fshati Fterrë në komunën Lukovë, zona malore. Të akredituar janë edhe 750 vëzhgues në këtë KZAZ, nga subjektet politike dhe organizatat joqeveritare.

Në KZAZ nr. 87, perfshihet bashkia Delvinë dhe komunat Vergo, Finiq dhe Mesopotam, me 24.975 votues. Në 3 KZAZ komisionerët i kanë takuar forcave politike PD, PS, PBDNJ, LSI, PDIU sipas marrveshjeve mes aleatëve.

Të tre KZAZ/të përfshihen në Qarkun e Vlorës dhe janë KZAZ me elektorat në zona minoritare, në zona administrative me lëvizje demografike të rritur ndjeshëm në vitet e fundit si dhe me lëvizjen e lirë me një numër votuesish emigrantë sezonal në vendin fqinj. Në zgjedhjet e 23 qershorit garojnë në një fletë votimi 66 subjekte politike në dy aleanca dhe një kandidat i pavarur, Arben Malaj.

HermesNews - ©2013

Dërgo me email | Stampo artikullin