15/06/2013 11:43:12

Mbyllet afati për fondet e BE-së

Fermerët nuk mund të aplikojnë më pas datës 15 Qershor

TIRANË - Sot, më 15 qershor, është mbyllur afati i dytë i dorëzimit të dokumentave për fermerët që duan të përfitojnë nga grantet e BE-së. Burime nga MBUMK bëjnë të ditur se gjatë kësaj periudhe, prodhuesit në ferma dhe agrobiznesmenët kanë pasur mundësinë për të aplikuar pranë AZHBR-së me qëllim përfitimin nga këto fonde. Procedurat kanë qenë të hapura edhe për ata fermerë, të cilët në thirrjen e parë kanë pasur probleme me plotësimin e dokumentacionit.

Shuma e vënë në dispozicion për fermerët është mbi 8 milionë euro. Ministria e Bujqësisë bën të ditur se, mbi 5 mijë fermerë në të gjithë vendin kanë përfituar nga skemat kombëtare subvencionuese, gjatë 5-mujorit të parë të këtij viti për mbjelljen e kulturave të reja bujqësore. Bimët mjekësore, ullinjtë, arrorët, pemët frutore, si dhe agrumet janë kulturat, që kanë rritur ndjeshëm interesin e fermerëve duke u bërë pjesë përfituese e ganteve të dhëna nga Agjencia e Zhvillimit Bujqësor dhe Rural.

Sipas të dhënave nga MBUMK, krahasuar me një vit më parë janë rritur ndjeshëm sipërfaqet e kultivuara. Gjithashtu, interesi edhe gjatë thirrjes së dytë të fermerëve për përfitimet nga fondet e Bashkimit Europian, nëpërmjet projektit IPARD Like ka qenë i lartë. Si risi e këtij procesi, interes është shfaqur edhe nga bizneset e reja agropërpunuese.

HermesNews - © 2013

Dërgo me email | Stampo artikullin