14/06/2013 16:17:16

Pandershmëritë e Taksës Progresive

nga Gaqo APOSTOLI

TIRANE - Taksa Progresive, si model fiskal që përdoret gjerësisht në vendet e zhvilluara, ka mbi një muaj që ka humbur nga terminologjia elektorale e lidershipit socialist, në rrugëtimin e këtij të fundit me autobuzin mavi të Rilindjes. Vetë Rama e ka mbyllur këtë kapitull, apo më saktë e ka devijuar, sepse nuk flet më për taksë progresive. Ka shpikur një term të ri. Quhet "taksim i ndershëm". Nuk ekziston në terminologjinë fiskale të asnjë vendi të botës dhe argumenti i vetëm që përdor për ta mbrojtur është tepër i përgjithshëm: kush fiton më shumë do të paguajë më shumë; kush fiton më pak do të paguajë më pak.

Pasi doli bllof me taksën progresive, terminologjia "taksim i ndershëm" që po përdoret në fushatën elektorale të PS-së, në media, në spote televizive apo në qindra mijëra postera, është vetëm një propagandë false që nuk bazohet në asnjë analizë financiare që të argumentojë rritjen e nivelit ekonomik të masës së shqiptarëve dhe të mirëqënies në shoqëri.

Fare shkurt do të parashtroja kështu. - > Taksa e Sheshtë është një taksë, e cila në fakt, përmban brenda vehtes një farë progresiviteti, që përmban dhe sloganin e Ramës që kush fiton më shumë, paguan më shumë, pavarësisht se shifra e taksimit është e njëjtë për të gjithë (10 përqind), përveç atyre që janë poshtë nivelit të rrogës prej 30 mijë lekë të reja. Pra, padashur ta thjeshtëzoj problemin, një personi që fiton nga rroga, p.sh. 35 mijë lekë do t'i mbahen 3,500 lekë, ndërsa një tjetri që merr rrogë 350.000 do t'i mbahen 35,000, pra dhjetë herë më shumë. Po në këtë nivel tatohen dhe të ardhurat e personave që marrin nga qiratë, punët dytësore, biznese të tjera etj.

- > Taksa Progresive është një Taksë e Sheshtë me kate, ku, përveç katit përdhes që e ka zero shifrën e taksimit, në çdo kat shifra e taksës është e njëjtë dhe sa më i lartë të jetë kati i të ardhurave që marrin njerëzit shifra rritet në mënyrë progresive dhe shkon sipas shteteve të ndryshme deri në 50,60,70 e deri 80 përqind.

- > Taksa Progresive është përdorur për shumë kohë në Shqipëri deri para disa viteve, por rezultoi e dështuar në mbledhjen e të ardhurave për shkak të evazionit fiskal të tejskajshëm dhe korrupsionit galopant të krijuar nga agresioni i biznesit mbi punonjësit dhe institucionet e dobëta shtetërore, si dhe teknologjisë primitive të organeve fiskale.

- > Taksa Progresive, vazhdon të përdoret gjerësisht në vendet e zhvilluara, sidomos në vendet e Welfare States - vendet Skandinave, por edhe në vende të tjera të BE, SHBA e Kanada etj, dhe inspiron ndjenja njerëzore për një mirëqënie për të gjithë, por kohë pas kohe ajo krijon parazitizëm në shoqëri, krijon klimë mbytëse për inisiativën e lirë të individit dhe investitorët vendas e sidomos të huaj, për shkak të barazitizmit social që tenton të frymezojë...

- > Ky fenomen po vihet re në shembuj masivë në këtë kohë krizë dhe në vendet e BE, në sipërmarrjet e mëdha, të mesme e të vogla të komunitetit të biznesit, por edhe në personalitete botërore që braktisin vendet e tyre për shkak të taksave të larta strtosferike (Gerard Depardieu etj.). Mbi të gjitha, zbatimi i Taksës Progresive kërkon institucione dhe organizma fiskale të stabilizuara e të kompletuara në mënyrë të gjithanëshme dhe veçanërisht, një shtet demokratik të konsoliduar, prej të cilit Shqipëria është ende larg.

- > Argumentat e mësipërme, por ndoshta dhe prania në grupin parlamentar socialist të disa miliarderëve, të cilët nuk kanë ndërmend të bëjnë harakiri me pasurinë dhe pasurimin e tyre duke votuar një ligj fiskal taksimi, që do të dëmtonte rëndë interesat e tyre në sipërmarrje, të cilat duan t'i zhvillojnë më tej, me sa duket kanë bërë që Rama të heqë dorë përfundimisht nga Taksa Progresive dhe t'i kthehet një fare Taksimi të Ndershëm, që vetëm i ndershëm nuk mund të jetë, sepse është një hiçgjë, një spekullim politik...shplarje truri që kërkon t'u bëjë shqiptarëve.

- > Në kontekstin e mësipërm, Shqipëria, një vend që synon të bëhet i zhvilluar përmes rritjes së vrullshme të investimeve dhe sipërmarrjeve të mëdha, vendase e të huaja, që sigurojnë ritme të larta të rritjes së nivelit të punësimit të njerëzve dhe me përparësi të brezit të ri, progres gradual dhe të sigurtë të rritjes së nivelit të mirëqënies, TAKSA E SHESHTE është tepër e përshtatëshme dhe si e tillë, ajo është TAKSA E NDERSHME, për Shqipërinë, nëse do të kërkohej një terminologji e tillë fiskale për kohën që jetojmë.

Ajo do të duhet të zbatohet dhe për disa kohë, në mënyrë që sipërmarrja e lirë dhe e ndershme në të gjitha nivelet, të marrë frymë lirisht dhe progresi të galopojë me ritme më të larta për punësim, mirëqënie dhe integrim, deri ne konsolidimin e institucioneve te shtetit demokratik, që përbën dhe sloganin e programit elektoral të Koalicionit Aleanca për Punësim, Mirëqënie dhe Integrim, që në fakt frymëzohet nga Politika Njerëzore e një Socialdemokracie realiste e shekullit të kaluar, që i përshtatet më së miri mentalitetit dhe realitetit të sotëm social, ekonomik e politik të Shqipërisë.

HermesNews - ©2013

Dërgo me email | Stampo artikullin