13/06/2013 15:10:33

Çfarë të hamë ?

Këshillat e mjekëve për këtë sezon

TIRANË - Stina e verës, e pasur me fruta dhe perime, është mundësia më e mirë për të gjithë për t'u ushqyer shëndetshëm, por edhe për ata që duan të bien nga pesha.

Mjekët thonë se frutat dhe perimet nuk duhet të mungojnë në tryezën e gjithsecilit në stinën e verës, për një ushqyerje sa më të shëndetshme. Pjata e parë në tryezë gjatë kësaj stine duhet të jetë sallata me perime.

Në një nga vaktet e përditshme duhet të jenë të pranishme sallata jeshile, spinaqi, etj, sa më të freskëta dhe sa më pak të gatuara, pasi kështu nuk rëndojnë organizmin dhe treten më shpejt. Po kështu, domatet dhe specat e të gjitha ngjyrave janë të rekomandueshme për t’u konsumuar në këtë stinë. Speci i kuq është më i pasur me vitaminën C dhe është një nga antioksidantët që ruan shumë sistemin imunitar.

Mjekët këshillojnë të mos konsumojnë gjatë verës ushqime që rëndojnë shëndetin, sikurse ato të pasura me proteina, ndër të cilët, mishi apo dhe fasulet.

Konsumimi i ushqimeve të lehta, gatimet me brumëra si makaronat, por të gatuara me salca të përgatitura me zarzavate, por edhe erëzat e stinës si borziloku, majdanozi, kopra, etj, janë të rekomandueshme në këtë stinë.

Në botë njihen dhe kultivohen afro 120 lloje perimesh, ndër të cilat mjaft të rëndësishme qepa, karrota, hudhra, lakra, sallatrat e ndryshme, patatja, domatja, etj.

HermesNews - ©2013

Dërgo me email | Stampo artikullin