11/06/2013 18:32:29

Infrastruktura, aty ku programet e partive politike ndahen

PS; infrastrukturë e gjelbër. PD, do të përfundojmë rrjetin e rrugëve kombëtare

TIRANE - Partia Demokratike dhe Partia Socialiste kanë shpalosur programet e tyre para elektoratit shqiptar me qëllim informimin e tij dhe afrimin pranë tyre të sa më shumë zgjedhësve, kryesisht atyre të pavendosur por edhe krijimin e besimit tek ata tradicional.

Në programin e saj Partia Demokratike, kalkulon se zgjerimi i infrastrukturës është "investimi më i mirë që mund të bëjmë", sepse jo vetëm që krijon një Shqipëri më të zhvilluar, por gjithashtu rrit ekonominë tonë dhe krijon vende pune.

Një projekt rrugor, sipas analizave të PD-së mund të punësojë që në momentin e parë punëtorë ndërtimi, inxhinier dhe furnitor. "Por vendet e punës krijohen dhe pasi rrugët përfundojnë së ndërtuari, duke hapur mundësi të reja biznesesh në treg dhe duke rritur ekonominë tonë për një periudhë të gjatë kohore. Për këtë arsye PD ka ndërtuar mbi 10 mijë km rrugë, shpenzuar 50 milionë euro në përmisimin e porteve detare, ashtu si dhe garantuar energji elektrike pa ndërprerje", i drejtohet PD, qytetarëve.

PD informon se në 8 vitet e saj të qeverisjes ka ndërtuar 458 rrjete ujësjellësish dhe 16 stacione përpunimi të ujërave të zeza, shtruar 1200 km kabëll fibrash optike shtesë, po ndërton 16 impiante të trajtimit të ujërave të ndotura, 4 prej të cilave janë funksionale. "Po ndërtohen qindra HEC-e dhe linja transmetimi të energjisë, 58 mijë vetë në vit janë punësuar në projektet tona të infrastruktuës. Ndërkaq kaskada e Devollit sapo nisi punimet" shkruan në program PD-ja.

Në mënyrë që të vazhdojë zgjerimin e infrastrukturës, PD angazhohet në një mandat të tretë të përfundojë të gjithë rrjetin e rrugëve kombëtare, rajonale dhe rurale, të rrisë investimet në transportin hekururdhor, ndërtojë me qindra hidrocentrale të reja, furnizojë 100 % me ujë zonat urbane, 95 % në zonat rurale, arrijë mbulimin mbarëkombëtar të rrjeteve të internetit, futjen e teknologjisë 4 G dhe M-Albania.

Nga ana tjetër Partia Socialiste ofron angazhimin e saj për krijimin e rrjetit të unifikuar të transportit, si enë komunikuese për të realizuar shpërndarjen e barabartë të mirëqënies dhe vlerave ekonomike në vend.

Ajo zotohet për hartimin e Masterplanit Kombëtar, vendosjen e standardeve europiane dhe rritjen e sigurisë rrugore, të cilat i përcakton si tre shtyllat ku do t'i mbështesë politikat e saj për zhvillimin e rrjetit rrugor.

Në programin e saj PS parashikon ndërtimin e koridorit të gjelbër autostradal Veri-Jug, që lidh bashkë 22 copëzat e rrugëve të sotme, nga Hani i Hotit në Kakavijë, me një standard të vetëm europian.

Po ashtu ndërtimin e koridorit të kaltër Veri-Jug, që lidh zonat turistike me njëra-tjetrën, përgjatë gjithë vijës bregdetare nga Velipoja në Butrint. Për zhvillimin e infrastrukturës hekurudhore, PS parashikon modernizimin e rrjetit duke synuar intregrimin me korridoret europiane hekurudhore.

HermesNews - ©2013

Dërgo me email | Stampo artikullin