06/06/2013 17:03:30

Ulen importet shqiptare gjate kater muajve te pare

Sipas INSTAT, importet nga Greqia kanë rënë me gati 20% me bazë vjetore për periudhën janar-prill, duke zbritur në 14.5 miliardë lekë

TIRANE - Në katër muajt e parë importet u tkurrën 7.3% me bazë vjetore dhe në vlerë 147 miliardë lekë, ku ndikim kryesor e dhanë importet nga Greqia, ku tregtarët shqiptarë i janë larguar vendit që prej mëse tre vitesh është zhytur në recesion nga kriza e borxheve.

Sipas INSTAT, importet nga Greqia kanë rënë me gati 20% me bazë vjetore për periudhën janar-prill, duke zbritur në 14.5 miliardë lekë. Megjithatë Greqia vijon të mbetet partneri i dytë i Shqipërisë për importet, pas Italisë, por pesha e tij ka zbritur në 10% të totalit, nga rreth 11.5% që ishte në 4-mujorin e parë 2012.

Në rënie kanë qenë importet nga Gjermania dhe Zvicra, përkatësisht me 13% dhe 77%. Italia mbetet destinacioni kryesor për importet me 35% të totalit, duke shënuar tendencë pozitive në 4 muajt e parë të vitit, ku rezulton se ato u rritën me 10% ose në 51 miliardë lekë.

Sipas grupmallrave, ndikimin kryesor në uljen e importeve e ka dhënë ulja e ndjeshme e zërit "minerale lëndë djegëse dhe energji", që është tkurrur 27% me bazë vjetore, në gati 26 miliardë lekë. Po ashtu me rënie rezulton dhe grupmalli "pije, ushqime dhe duhan" me 4% me bazë vjetore, 28 miliardë lekë. Importet e materialeve të ndërtimit e metaleve ranë me 6.9% në 17.5 mld lekë. Po ashtu importet e makineri e pajisje këmbimi u tkurrën me 7.9%, në 27.4 miliardë lekë.

HermesNews - ©2013

Dërgo me email | Stampo artikullin