05/06/2013 16:46:35

Përgatisnin bomba artizanale për në sheshet publike, tre arrestime

Bëhet e ditur gjithashtu se, me cilësinë e provës materiale u sekuestruan dy shishe me lëndë djegëse, të dyshuara si ato të pregatitura për bomba molotov

TIRANË - Forcat e policisë së kryeqytetit parandaluan një ngjarje të rëndë.Sipas komunikatës zyrtare, shpërndarë sot për shtyp nga policia e Tiranës, strukturat e Komisariatit Nr.1, në sajë të marrjes në kohë të një informacioni në lidhje me hedhjen e disa shisheve me lëndë plasëse të dyshuara bomba molotov, të pregatitura në mënyrë artizanale, bënë të mundur kapjen në kushtet e flagrancë të autorëve të tyre, duke neutralizuar dhe sekuestruar në kohë lëndët plasëse.

Në këtë kuadër, u mor masa e arrestit të mënjehershëm në kushtet e flagrancës së shtetasve: Skëndë Tufa, 53 vjec dhe Petrit Lipo, 52 vjec, me banim në Tiranë.

Sipas policisë, shtetasit e lartëpërmendur, u arrestuan në kushtet e flagrancës në momentet e posedimit të bombave molotov të pregatitura në mënyrë artizanale, të cilat më pas dyshohet se do t’i përdorinin për t’i hedhur në grumbullime me njerëz dhe sheshe publike.

Bëhet e ditur gjithashtu se, me cilësinë e provës materiale u sekuestruan dy shishe me lëndë djegëse, të dyshuara si ato të pregatitura për bomba molotov, të cilat ju kaluan për ekzaminime të mëtejshme strukturave përkatëse. Çështja në fjalë do t’i referohet Prokurorisë së Rrethit Gjyqësor Tiranë.

HermesNews - ©2013

Dërgo me email | Stampo artikullin