04/06/2013 14:47:54

E-punësimi 4361 qytetarë aplikojnë

Në portalin e-punësim, janë aktualisht 133 vende të lira pune, për të cilat aplikantët mund të garojnë me formimin e tyre personal

TIRANË - Qytetarët shqiptarë shfaqen mjaft të interesuar në gjetjen online të një vendi pune. Pas më shumë se dy muajsh nga përurimi i portalit e-punësim, numri i aplikimeve ka arritur në 4361 persona që janë regjistruar me CV-të e tyre në këtë faqe në pritje të aprovimit. Po kështu edhe numri i punëdhënësve, që japin ofertat e tyre të punës nuk është i ulët. Në portal janë regjistruar zyrtarisht 4202 punëdhënës.

Në portalin e-punësim, janë aktualisht 133 vende të lira pune, për të cilat aplikantët mund të garojnë me formimin e tyre personal. Ndërkohë që një muaj më parë rezultonin 206 vende. Të interesuarit duhet të ndjekin të gjithë hapat që janë lehtësisht të aksesueshme në portalin www.epunesim.gov.al.

Ofertat e paraqitura për vende të lira pune janë të shumëllojshme, ku përfshijnë si shërbime të ndryshme të tipit kamarier, banakier, shitës, rrobaqepës, etj, deri tek profesionet me arsim të lartë si jurist, ekonomist, inxhinier, etj.

Ky portal u përurua më 25 shkurt të këtij viti. Projekti është i shtrirë në 12 zyrat rajonale të punësimit, 24 zyrat lokale të punësimit, si dhe përfshin informatizimin e plotë të sistemit të brendshëm të Shërbimit Kombëtar të Punësimit. Aktualisht në të gjithë vendin raportohen rreth 141 mijë të papunë, ndërkohë popullsia rezidente sipas censusit 2011 rezulton 2. 821. 977 banorë.

HermesNews - ©2013

Dërgo me email | Stampo artikullin