04/06/2013 11:49:23

Durrës, po biçikletat ku t'i vëmë ?

Krahasuar me vitet 1990, në qytetin bregdetar biçikletat përdoren 4-5 herë më pak

DURRES - Shfrytëzimi i biçikletave për lëvizje brenda qytetit të Durrësit ka rënë ndjeshëm, për shkak të mungesës së hapësirave të nevojshme pranë rrugëve kryesore. Krahasuar me vitet 1990, në qytetin bregdetar biçikletat përdoren 4-5 herë më pak, megjithëse më shumë se 85 për qind e familjeve banojnë në zonën fushore të qytetit. Shitësit dhe riparuesit e mjetit me dy rrota ("dyrrotakut") thonë se kërkesat për to kanë rënë në të njejtën mënyrë siç është rritur përdorimi masiv i autoveturave të çdo lloji.

Xhevat C., i cili prej 15 vjetësh jeton me këtë profesion, thotë se shumë në një javë shiten shumë më tepër autovetura të përdorura në pikat e shumicës në Shkozet, se sa biçikleta. Sipas tij, në ndryshimin e këtyre raporteve ka ndikuar edhe mungesa e vizionit të administratës së bashkisë.

Thuajse në të gjitha rrugët kryesore në shëtitoren bregdetare apo edhe në zonën e plazhit mungojnë tërësisht pistat e biçikletave për të rritur dhe për fëmijë. Në bulevardin "Dyrrah", i cili u rindërtua para dy vjetësh me një projekt të ri, qytetarët me biçikleta kanë filluar të shfrytëzojnë trotuarët ku janë parashikuar të lëvizin vetëm kalimtarët.

E njejta situatë edhe në bulevardet "Epidamn" dhe "Egnatia", ku qarkullojnë mijra automjete në ditë, po ku kalimi i biçikletave është bërë i rrezikshëm. Rastet e aksidenteve me viktima në radhët e përdoruesve të biçikletave nuk janë të pakta, duke shkurajuar edhe ata qytetarë që kërkojnë zgjidhje më pak shpenzime për lëvizjen brenda qytetit. Niveli i ndotjes në rrugët e qytetit antik është i lartë, megjithë avantazhin që i jep atij afërsia me detin, ndërsa përpjekjet për të nxitur përdorimin e biçikletave janë shumë të vakëta.

HermesNews - ©2013

Dërgo me email | Stampo artikullin