28/05/2013 15:28:24

Propozimet e biznesit për amnistinë

DHTI kërkon ndërhyrjen me akte ligjore që mundëson kompensimin ose pezullimin e afateve të pagesave për detyrimet tatimore si Tatimi mbi Vlerën e Shtuar dhe Tatim Fitimi në favor të të gjitha kompanive private

TIRANE - Dhoma e Tregtisë dhe Industrisë Tiranë dhe përfaqësuesit e shoqatave të sipërmarrjes private, duke vlerësuar me objektivitet krizën ekonomike si dhe pasojat e saj në ekonominë shqiptare, kërkojnë një zgjidhje të shpejtë të situates, e cila do të jetë efektive në terma afatgjatë për ekonominë e vendit.

DHTI kërkon ndërhyrjen me akte ligjore që mundëson kompensimin ose pezullimin e afateve të pagesave për detyrimet tatimore si Tatimi mbi Vlerën e Shtuar dhe Tatim Fitimi në favor të të gjitha kompanive private, kur shuma e detyrimit që sistemi i buxhetit të shteti i ka këtyre kompanive, është më e madhe se shuma e detyrimeve tatimore që kompanitë kanë për të shlyer.

Të aplikohet fuqia vepruese e ligjit nr. 10 418 të datës 21 prill 2011, për "Legalizimin e kapitalit, dhe faljen e një pjese të borxhit tatimor dhe doganor" 2011, 2012, duke përfshirë në këtë ligj propozimet e Dhomës së Tregtisë dhe Industrisë dhe shoqatave të biznesit.

Në të gjitha rastet për subjektet që përfitojnë nga ky ligj, organet e specializuara të hetimit nuk mund të fillojnë ndjekjen penale duke u bazuar nga deklarimet vullnetare sipas këtij ligji.

Në rastet e fillimit të ndjekjes penale, organet e specializuara të hetimit kanë detyrimin dhe përgjegjësinë për mbledhjen e provave dhe dokumenteve lidhur me ngritjen e akuzave dhe argumentimin e tyre në Gjykatë.

Në Nenin 18, të përcaktohen qartë çfarë detyrimesh tatimore përfshihen në këtë ligj. Të gjitha gjobat e vëna nga institucionet shtetërore ndaj qytetarëve shqiptarë dhe sipërmarrrjes shqiptare. Si psh: gjobat e vendosura nga hipotekat për dorëzimin e kontratave të shitjeve me vonesë apo procedurat e tjera si kjo.

Të gjitha gjobat e vëna nga të gjitha drejtoritë dhe inspektoriatet që operojnë në territorin e Shqipërisë deri në datë 31.12.2010. Të gjitha detyrimet tatimore që kanë të bëjnë me marrëdhënien biznes-sistem fiskal. Neni 21 të ndryshojë si më poshtë: Tarifa e pagesës duhet të jetë jo më shumë se 20%. Neni 22 të ndryshojë si më poshtë: Deklarimi vullnetar i detyrimit tatimor

Tatimpaguesit, të cilët për periudhat tatimore deri më 31.12.2010 kanë deklaruar shumën e detyrimit tatimor më të vogël se detyrimin real, kanë të drejtë që brenda periudhës së këtij ligji të vetëdeklarojnë detyrimet tatimore pranë zyrës së tatimeve, deklarime këto që duhet të verifikohen dhe legjitimohen nga zyra e tatimeve nëpërmjet kontrollit.

Tarifa që aplikohet në këto raste do të jetë 30% e detyrimit duke falur pjesën tjetër të detyrimit, gjobat dhe kamatvonesat. Dispozitat e pikës 2 të nenit (18) të këtij ligji lidhur me kompensimin e tepricave kreditore zbatohen në këtë rast.

Për efekt të këtij ligji, të gjitha kontrollet e ushtruara në subjektet tatimpaguese deri në 31.12.2010 si dhe të gjitha kontrollet që do të kryhen sipas procedurës së vetëdeklarimit nuk mund të rishikohen nëpërmjet procedurës së rikontrollit për asnjë lloj arsye nga administrata e sistemit fiskal.

Sa I përket përdorimit dhe destinacionit të fondeve, 65 % e fondeve të mbledhura nga ky ligj të përdoren nga buxheti i shtetit sipas nevojave të tij. 30 % e këtyre fondeve të mbledhura të përdoren si grant për kredidhënie me tarifa të reduktuara për sipërmarrjen shqiptare. 5 % e fondeve të mbledhura të përdoren për agjentët e mundshëm që do të shërbejnë për mbledhjen e këtyre fondeve si dhe për fushatën promocionale të informimit për qytetarët dhe sipërmarrësit që do të jenë subjekt i këtij ligji.

HermesNews - ©2013

Dërgo me email | Stampo artikullin