28/05/2013 10:49:55

Moore fillon takimet me kreret

Gjatë vizitës së fundit në Tiranë muajin e shkuar, Moore, në një konferencë shtypi në Ambasadën Amerikane, deklaroi se, 'Shtetet e Bashkuara duan të shohin KQZ-në të funksionojë'

(10:56) - Drejtori për Europën Qendrore dhe Jugore në Departamentin Amerikan të Shtetit, Jonathan Moore, në përfundim të takimit me kreun e opozitës Edi Rama, bëri të ditur se vizita e tij në Tiranë synon arritjen e një marrëveshjeje pozitë-opozitë, në kuadrin e riformatimit të Komisionit Qendror të Zgjedhjeve.

“Ne synojmë një marrëveshje dhe shpresojmë që shqiptarëve t’iu jepet mundësia të shkojnë në zgjedhje e 23 qershorit e të votojnë normalisht”, tha Moore, gjatë një prononcimi të shkurtër para gazetarëve. Ai konfirmoi më tej takimet në vijim të ditës me liderët kryesorë të politikës në vend, duke paralajmëruar një komunikim më të zgjeruar nesër me gazetarët, mbi aktivitetin e tij në Tiranë.


TIRANË - Drejtori për Europën Qëndrore dhe Jugore në Departamentin Amerikan të Shtetit, Jonathan Moore, ka nisur mëngjesin e sotëm takimet në Tiranë.

Axhenda e tij e takimeve, ka nisur me kryesocialistin Edi Rama në selinë e PS, ndërsa do vijojë me të tjerë krerë të partive politike. Në qëndër të bisedimeve të diplomatit amerikan me politikanët shqiptarë pritet të jetë situata parazgjedhore dhe ngërci i krijuar në KQZ.

Gjatë vizitës së fundit në Tiranë muajin e shkuar, Moore, në një konferencë shtypi në Ambasadën Amerikane, deklaroi se, "Shtetet e Bashkuara duan të shohin KQZ-në të funksionojë".

Kryeministri komentoi dy ditë më parë gjatë një bashkëbisedimi me gazetarët në Elbasan vizitën në Tiranë të zyrtarit të Departamentit të Shtetit, Jonathan Moore, për të cilin tha se, "është një mik i mirëpritur i shqiptarëve".

"Do të kem një takim shumë të mirë me z. Moore. Vizita e tij në Tiranë është një dëshmi e interesit për një Shqipëri që ecën drejt zhvillimit dhe afrimit me integrimin. Qeveria amerikane ka bërë gjithçka për integrimin tonë dhe statusin, duke bërë thirrje për votimin e tre ligjeve dhe po ashtu dhe zonja Klinton, gjatë fjalës së mbajtur në Kuvend", theksoi Berisha.

Pas dorëheqjes në muajin prill të tre anëtarëve të KQZ-së të propozuar nga opozita parlamentare, Komisioni Zgjedhor vijon punën me 4 anëtarë.

HermesNews - ©2013

Dërgo me email | Stampo artikullin