27/05/2013 16:17:59

Jahtet, gati proçedurat ne porte

Në pikën kufitare të portit të Vlorës aplikohen procedura të përshpejtuara për mjetet lundruese turistike të huaja

VLORE - Një muaj më parë, Aleksandër, një 55 vjeçar nga Marseja (Francë), hyri me mjetin e vet tip jahti në portin e Vlorës. Kishte ardhur për të qëndruar dy ditë në portin e jahteve në Orikum dhe i duhej të kryente praktikat e hyrjes në Vlorë.

“Aplikoni procedura shumë të përshpejtuara me mjetet lundruese dhe kjo është gjë e mirë”, më thoshte gjatë një prononcimi. Në fakt, në pikën kufitare të portit të Vlorës aplikohen procedura të përshpejtuara për mjetet lundruese turistike të huaja, që ankorohen përgjatë bregdetit veçanërisht gjatë sezonit veror.

Burime zyrtare të Drejtorisë së Policisë Kufitare dhe Migracionit për Qarkun e Vlorës, bënë të ditur se, procedurat zgjasin vetëm pak minuta, aq sa është e nevojshme për të rregjistruar në sistemin TIMS mjetin dhe të dhënat personale të shtetasit të huaj. Mjeti lundrues turistik, jaht apo çdo lloj tjetër, paraqitet fillimisht në pikën kufitare të portit të Vlorës ku kryhet praktika e rregjistrimit, e cila përfundon brenda një kohe shumë të shkurtër. Në këto procedura përfshihet edhe deklarimi i kohës së qëndrimit, ndërkohë që më pas, mjeti lejohet të lundrojë për në destinacionin e vet, siç mund të jetë porti i jahteve në Orikum, apo të ankorohet në kalatat e portit të Vlorës. E njëjta praktikë ndiqet edhe për kroçierat që ankorohen në portin e Vlorës, të cilat gjithashtu, trajtohen me procedurë të përshpejtuar.

Por, nuk përjashtohen edhe rastet kur në gjirin detar të Vlorës hyjnë njëkohësisht më shumë se 3-4 mjete lundruese turistike, të cilat kanë si destinacion portin e jahteve në Orikum. Në kushte të tilla, në bashkëpunim me autoritetet e tjera portuale, doganën dhe kapitenerinë, caktohet një personel i posaçëm që kryhen procedurat pranë portit, ku mjetet kanë destinacionin. Kjo praktikë aplikohet në rastet e zhvillimit të regatave me itinerar Itali-Orikum , në të cilat marrin pjesë disa dhjetra jahte e veliera italiane.

HermesNews - ©2013

Dërgo me email | Stampo artikullin