24/05/2013 11:43:15

Taksat, çfarë duhet të dimë për programet e dy koalicioneve të mëdha

Flasin ekspertët e dy kampeve për sistemin e taksave te propozuara në programet e garës elektorale

TIRANE - Ekspertë të financave publike, të djathtë dhe të majtë, ndahen në thelb në programin ekonomik, që do të mund të zbatojnë pas zgjedhjeve të përgjithshme të 23 qershorit.

Maxhoranca shpreh vullnetin e saj për të vijuar aplikimin e taksave të ulëta, zgjerimit të barrës fiskale si dhe mbështetjes së biznesit, duke bërë të mundur mbetjen e më shumë parave në kontot e tyre në këtë kohë krize, si një ndër stimujt më të mirë fiskalë që çon edhe në rritjen ekonomike.

Por, opozita thotë se është koha për vendosjen e një rregulli fiskal në financat publike. Ajo vazhdon të mbetet e teorisë së taksës progresive. Për këtë debatet u hapën që pas propozimit të Kryeministrit Sali Berisha për heqjen e taksës së tatim fitimit për pagat e punonjësve nën 30 mijë lekë. Kjo, sipas z. Berisha, çon në rritjen automatikisht të pagave të këtij niveli me 10 %.

Deputeti i PD-së, ish-zëvendësministër i Financave, Sherefedin Shehu, thotë se programi ynë ekonomik ka dallim të thellë me atë të Partisë Socialiste.

"Politika e PS-së për tatimin mbi të ardhurat në fakt thotë se unë do të rris nivelin e tatimeve. Këtë e ilustron duke thënë progresion dhe barazi. Fjalë të bukura që nuk prodhojnë asgjë, sepse e vërteta është se ajo politikë fiskale, që propozon PS, ka të bëjë me rritje të taksave për atë kategori siç janë bizneset dhe qytetarët që fitojnë më shumë, të cilët krijojnë vende pune. Pra do të taksohen të ardhurat e atyre kategorive, që mund të përdoren për të krijuar vende punë në Shqipëri", thotë Shehu.

Ndërsa politika që ka zbatuar PD-ja, thotë Shehu, ka qenë ulja e nivelit të taksës nga 23 %, që e gjetëm në 2005-ën tatimin e koorporatave në 10 % dhe e kontributit të sigurimeve shoqërore, që është tatim i drejtpërdrejt dhe vënia në të njëjtin nivel e tatimit mbi të ardhurat personale ka për qëllim zbutjen e shtigjeve dhe ngushtimin e tyre për evazion fiskal.

"Duke vënë tre lloj taksash në të njëjtin nivel nuk kanë interes për të fshehur të punësuarit, ndërsa tani qeveria rriti minimumin e patatueshëm në 30 mijë, nga 10 mijë që ishte", tha Shehu.

Por, kjo kundërshtohet nga ekspertë të ekonomisë së Partisë Socialiste. Ata shprehen se politikat e ndjekura nga qeveria janë diametralisht të kundërta nga ato që kërkonte ekonomia.

PS, sipas tyre, ka politikën e vet fiskale, përmes së cilës do të kërkojë një taksim më të ndershëm. Vendosja e taksës progresive, shprehen ata, do të mbështesë rritjen ekonomike. Politika jonë, theksojnë, ata do të fokusohet në çështje thelbësore, si pronat, që evidentohet si pengesë kryesore për çdo investitor, korrupsioni apo edhe efiçenca e administratës, etj.

Nëse nga mostatimi i të ardhurave, sipas ekspertëve të PS-së për ekonominë, do të ketë rënie të të ardhurave, një pjesë e tyre do të kompensohet nga rritja ekonomike dhe një pjesë nga një tatim më i ndershëm.

“Do të merren të gjitha masat e nevojshme për përmirësimin e situatës ekonomike në vend përmes kthimit të rregullit në financat publike, sepse kështu përfitojnë shqiptarët, që nuk varfërohen më shumë, fiton biznesi sepse ka më shumë para, por edhe ekonomia, pasi tregon se qeveria është e përgjegjshme edhe përmes masave, që mbase në fillimet e tyre nuk janë edhe aq të dashura", shprehen ekspertë të majtë të ekonomisë.

HermesNews - ©2013

Dërgo me email | Stampo artikullin