23/05/2013 15:03:14

Zyrtarët me imunitet të kufizuar: AI vlerëson reformën

Amnesty International në raport përmend dhe ndryshimet e bëra në kodin penal mbi dhunën në familje

TIRANË - Në raportin e saj më të fundit, organizata Amnesty International, vlerëson reformat e ndërmarra nga qeveria shqiptare për kufizimin e imunitetit të deputetëve dhe të zyrtarëve të tjerë publik nga prokuroria dhe rishikimin e Kodit Zgjedhor.

Gjithashtu ndër të tjera në këtë raport, Amnesty International vlerëson dhe ndryshimet e bëra në kodin penal mbi dhunën në familje. “Në Shqipëri janë regjistruar 2,526 incidente të raportuara të dhunës në familje. Kjo shifër është 345 më shumë se në vitin e kaluar. Gjithashtu janë shtuar dhe peticionet nga viktimat për urdhërat e mbrojtjes gjyqësore. Shumica e viktimave ishin gra. Një amendament në Kodin Penal e bën dhunën në familje një vepër penale të dënueshme me burgim deri në pesë vjet. Ndërkohë që nuk kishte asnjë dënim minimal për vepra të tilla, përveçse kur kryhen në mënyrë të përsëritur dhe ndjekjet penale bazohen vetëm në ankesën e viktimës”, thuhet ndër të tjera në raportin e Amnesty International.

Në raportin për Shqipërinë përmendet gjithashtu diskriminimi ndaj komunitetit LGBT. AI veçon se parada e tyre e parë e zhvilluar në majin e 2012, ishte e suksesshme, por në korrik të atij viti Prokuroria e Tiranës hodhi poshtë një padi penale nga ana e organizatës LGBT kundër Zv.ministrit të Mbrojtjes Ekrem Spahiu në lidhje me fjalimin e tij homofobik për këtë paradë.

Raporti i Amnesty International ndalet dhe tek të drejtat e strehimit të jetimëve. Sipas tyre, të rinjtë që largohen nga përkujdesi social rrezikojnë të mbeten pa strehë, pavarësisht nga legjislacioni që i garanton jetimëve të regjistruar strehim social deri në moshën 30-vjeçare.

Për këtë arsye, disa prej tyre jetojnë në konviktet e shkollave të pashfrytëzueshme ose luftojnë për të paguar një qera të ulët për banesa private.

HermesNews - ©2013

Dërgo me email | Stampo artikullin