23/05/2013 10:56:30

Ambasadori amerikan flet për vizat në planin teknik

'Ka një konfuzion se cili është sistemi amerikan dhe udhëtimi pa viza në Schengen që Shqipëria fitoi më 2010-n'

TIRANE - I pyetur lidhur me deklaratat për heqjen e vizave me SHBA-të, Ambasadori amerikan Aleksander Arvizu sqaroi se "kjo çështje lidhet me atë që njihet si programi i udhëtimit pa viza. Është një program specifik që legjislohet prej Kongresit të SHBA. Vetëm 37 vende nga e gjithë bota përfitojnë prej kësaj, 30 vende në Europë dhe 7 në Azi".

Diplomati amerikan nënvizoi se "ka kërkesa shumë teknike që një vend të kualifikohet ose të konsiderohet, dhe njëra prej tyre është që niveli i refuzimit të vizave të llojit B nuk duhet të jetë më i lartë se 3%. Ne kemi treguar se në vitin 2012 niveli i refuzimit për Shqipërinë ka qenë 40.5%. A ka qenë ky një vit i keq? Kam parë statistikat për 7 vite, disa vite ka qenë më i lartë, disa vite më i ulët. Ky është programi i udhëtimit pa viza".

Sipas tij, ka një konfuzion se cili është sistemi amerikan dhe udhëtimi pa viza në Schengen që Shqipëria fitoi më 2010-n. "Janë dy procese tërësisht të ndryshme. Në rastin europian nuk është tërësisht e lidhur me stabilitetin dhe procesin e anëtarësimit. SHBA-të e mbështesin Shqipërinë për t’u bashkuar me BE-në, por programi i udhëtimit pa viza është tërësisht i ndryshëm”, përfundoi Arvizu.

HermesNews - ©2013

Dërgo me email | Stampo artikullin