22/05/2013 17:46:56

Kultura kozmopolite: ekonomia politike duhet të jetë kombëtare

Përse është e nevojshme që ekonomia dhe sistemi financiar i një vendi të jenë kombëtare, pra të mbyllura ?

HermesNews - Pjesa më e madhe e analistëve ekonomik gjysëm-keynesian ose keynesian të rremë, të cilët korrin suksese prej kohësh nga rrjeti, aktualisht mohojnë ose anashkalojnë një fakt shumë të rëndësishëm të ekonomisë globale. Bëhet fjalë për politikën ekonomike të një shteti.

Një shtet sovran, i cili mund të konsiderohet i lirë të vendosë në autonomi të plotë mbi sasinë e monedhës që hedh në treg në mënyrë të drejtëpërdrejtë ose me anë të bankave më të mëdha tregtare , gjithashtu edhe mbi mënyrën e hedhjes së kësaj sasie në treg, nuk ka asnjë nevojë që të lejojë që financimi ekonomik, publik apo privat qoftë, të vijë nga para të prodhuara jashtë.

Eshtë interesant fakti që pjesa më e madhe e këtyre keynesianeve të rremë janë amerikan dhe janë mësuar të arsyetojnë mbi realitetin ekonomik të Shteteve të Bashkuara, karakteristikat, nevojat dhe problemet e së cilit s’kanë të bëjnë aspak me ato të shteteve të tjera europiane. Për shembull nëse ka një krizë financiare në Shtetet e Bashkuara, kapitali ekonomik shkon i gjithi aty ose së paku mbetet brenda per brenda tyre, ndërsa nëse ndodh e njëjta situatë në shtetet europiane si Italia , kapitali largohet nga shteti, duke thelluar maksimalisht krizën.

Ky është një shembull mëse konkret për të ndjekur dhe zbatuar thënjen e famshme: “Ata që, duke diskutuar për tematika ekonomike, marrin si shembull Shtetet e Bashkuara, nëse e kanë me të drejtë, janë budallenj, nëse e kanë me dredhi, janë mashtrues.”

Ajo që habit më tepër është se këta gjysëm-keynesian ose keynesian të rremë janë europian, si për shembull italian,etj. Ata mundohen të jenë heterodoks duke mos kundërshtuar parimin globalist dhe duke përmbledhur të gjitha bazat e ekonomisë kozmopolite, por në fund të fundit themeli është po i njëjti.

Duke lexuar “Letrën e ekonomistëve” është befasues komenti i një profesori të thjeshtë në lëndë juridike, i cili është treguar më largpamës se shumë ekonomistë të tjerë duke parashikuar se cfarë do të ndodhte. Ja fjalët e tij:
“Bashkohem me shumë nga propozimet politike të ekonomistëve. Do të jenë vetë shtetet që do ti vënë në zbatim herët a vonë. Sot për sot nuk munden sepse ia kanë dorëzuar sovranitetin BE-së. Kjo e fundit në mënyrë abstrakte ka në dorë gjithcka, sic mund të shihet lehtë nga vendimi për të blerë titujt e shteteve: është Sovrani ai që vendos për “gjendjet e jashtëzakonshme”. Por BE-ja nuk do ti marrë të tilla vendime dhe do të shpërbëhet ose do të kthehet në një rend politik, me kufizime më të vogla për shtetet dhe me më pak hapësirë.”

Cështja kyce në një situatë të tillë qëndron në faktin se ekonomistët, duke u hequr si globalist, nuk bëhen përpara dhe të pranojnë se një kontroll politik mbi ekonominë, ndërhyrja e të cilit do ishte e nevojshme për shpërndarjen e pasurisë dhe për të shmangur skuilibrimet, mund të gjindet vetëm në një shtet të mbyllur në profilin ekonomik. Falë konkurrencës bankare me banka të shteteve të tjera , shteti edhe pse formalisht sovran, ka humbur tashmë pjesën më të madhe të fuqisë së tij për të kontrolluar buxhetin dhe kursimet në sferën ekonomike. Nuk është nevoja të jesh ekonomist për të kuptuar një gjë të tillë.

Dhe s’mund ti vihet faji as Keynes-it, sepse ai vetë shprehej kështu: “ Jam më shumë dakort me ata që mendojnë se duhet pakësuar ndërthurja ekonomike mes shteteve , se sa me ata që mendojnë se ajo duhet rritur. Idetë, njohuritë, arti, mikpritja, udhëtimet jane ato gjëra të cilat falë natyrës së tyre duhet të jenë vlera ndërkombetare. Prandaj duhet përpjekur që mallrat të prodhohen në vend në mënyrë sa më të arsyetueshme dhe të përshtatshme të jetë e mundur, dhe mbi të gjitha që financa të jetë kombëtare.” (Keynes, “Vetë-mjaftueshmëria kombëtare”, 1933).

Pra kultura është ajo që duhet të jetë ndërkombëtare dhe pikë bashkimi apo gjuhë e përbashkët e shteteve mes tyre, ndërsa ekonomia duhet të jetë kombëtare dhe vendase.

Faktikisht këshillat e Keynes-it do të ishin shumë të cmuara për politikën ekonomike që mbizotëron sot në vendet europiane, ku shpesh herë problemet anashkalohen ose shtyhen duke propozuar si zgjidhje politika të ndryshme espansive dhe globaliste që shohin në krye atë që sot për sot është struktura që ka bërë hapin më të madh ndërkombëtar, Bashkimi Europian.

Përktheu Daniela Vathi

Dërgo me email | Stampo artikullin