20/05/2013 16:17:16

Murgu tibetan rrihet për vdekje nga policia

Një episod i ri persekutimi politik nga regjimi komunist kinez. Një murg tibetan është dhunuar për vdekje nga policia kineze pasi mbante disa regjistrime me fjalime të Dalai Lamës.

HermesNews - Një episod i ri persekutimi politik nga regjimi komunist kinez. Një murg tibetan është dhunuar për vdekje nga policia kineze pasi mbante disa regjistrime me fjalime të Dalai Lamës. Rasti është bërë i njohur falë sitit Radio Free Asia, i cili shpegon se me 21 prill policia ka shkuar në shtëpinë e murgut Kardo, në qarkun e Dzogang në zonën “autonome” tibetane, dhe pasi kanë zbuluar regjistrimet në dhomën e tij, e kanë rrahur dhunshëm, duke i lënë plagë të rënda deri sa vdiq me 28 prill.
Policia ende nuk është shprehur në lidhje me ngjarjen.

Murgu Kardo, pas humbjes së të dy prindërve, ka jetuar për shumë kohë në manastirin Champa Ling deri sa u largua që aty për faktin se në atë manastir praktikohej ende kulti i Shungden, të cilin Dalai Lama nuk e ka aprovuar për shumë vite sepse ngjallte shumë përcarje dhe probleme sociale në komunitetin tibetan.

Gjithashtu dissidenti Zhu Yufu, i cili është dënuar me 7 vjet burg me akuzën e tentativës së përmbysjes së qeverisë, u ka treguar familjarëve gjatë vizitës mujore se është në gjendje shumë të këqija shëndetsore , i ka rënë disa herë të fikët dhe vuan nga tensioni i lartë, marramendje dhe të përziera. Informacionet janë bërë të ditura nga organizatat jo qeveritare që luftojnë për të drejtat e njeriut në Kinë.

Sipas autoriteve kineze, ai gënjen vetëm për të marrë një arrest shtëpie apo ulje të denimit dhe për ta ndëshkuar për këtë veprim, i është ndaluar të telefonojë dhe presë vizita nga familjarët e tij si dhe ushqimi do ti pakësohet.

Ai u arrestua në 2012 sepse kishte nxitur njerëzit me poezi dhe mesazhe, të përhapura publikisht dhe me anë të internetit, që të luftonin për një demokraci më të madhe në Kinë. Edhe më parë në 1999 ishte arrestuar pasi i ishte bashkangjitur partisë demokratike kineze.

Dhe nuk mbaron me kaq! Shtatë avokatë janë arrestuar dhe rrahur nga autoritetet e Sichuan, në jug të Kinës, ndërkohë që po përpiqeshin të vizitonin burgun më të madh sekret të rajonit. Ata u rrethuan nga policia në momentin kur po hynin në Ziyang Legal Education Center dhe u rrahën brutalisht.

Dy prej tyre u plagosën rëndë: i pari humbi shumë gjak nga goditjet në kokë, ndërsa i dyti u plagos në këmbën e djathtë nga gurët e gjuajtur nga policët. Në grupin e avokatëve të arrestuar bënte pjesë edhe Tang Jitian, avokat për të drejtat e njeriut i cili u arrestua dhe u torturua gjatë Revolucionit të Jasemineve dy vjet më parë.

Sipas burimeve të organizatës Human Rights in Cina, në burgun e lartpërmendur gjenden më shumë se 260 persona. Disa nga të burgosurit mbahen në qeli prej 5-6 vjetësh pa ndonjë dënim formal, ndërsa të tjerë kanë vdekur nga torturat.

Daniela Vathi

Dërgo me email | Stampo artikullin