14/05/2013 17:03:53

A duhet të kthehesh pas ?

nga Doriana Metollari

HermesNews - Ia vlen të kthehesh pas kur një vendim është marrë ? Nuk e di. Unë disa herë e kam bërë dhe ja çfarë kam zbuluar: një rrugë të re. Gjithsesi nuk ia vlen dhe nuk duhet të jesh përherë i lëkundur, të paktën jo pa patur arsye të fortë pas.

Të jesh dikushi në jetë do të thotë të shohësh sa më pak çfarë lë pas dhe të mos kthehesh as për një minutë kur merr një vendim, por kur instinkti të thotë “bëje!” mbase duhet ta provosh. Një herë do të thoja, jo më shumë se pastaj bëhesh i varur nga vesi yt.

Në një shoqëri të zhurmshme, siç është kjo e jona sot, nuk para ka shumë hapësirë për t’i vënë vesh zërit të brendshëm, sepse të paktën një zhurmë makine, nje zile celulari, një mbledhje që nuk duhet ta humbasësh apo një takim me fjalë boshe, do të të bëjë me patjetër të jesh në anën e atij që thotë, “nuk ke kohë”.

E megjithatë çelësi i suksesit nuk është të gjesh kohë, por të seleksionosh. E kam kuptuar dhe po e praktikoj në 360 gradë. Seleksionimi është mënyra më e mirë për të mos humbur çastet që me të vërtetë do të të duhen për të investuar në diçka të dobishme për ty.

Kur seleksionon, ndalesh dhe reflekton për atë që është me të vërtetë e rëndësishme dhe kur e kupton se është e rëndësishme, mund të kthehesh pas me durim sepse truri është i përqëndruar në atë që e intereson dhe shqisat janë të zgjuara ndaj sinjaleve që i japin qëllimet në të përditshmen.

Për këtë doja t'ju flisja sot. Nuk mund t'ju them, nëse duhet ose jo të ktheheni pas, por mund t'ju them me siguri se jeni ju ata që duhet të zgjidhni, dhe për ta bërë duhet të ndjeheni të lirë nga ankthet, emocionet negative dhe paragjykimet që mund të kenë për ju. Të lirë nga ambjenti që ju rrethon nga bota me të cilën keni kontakt çdo ditë.

Dhe liria kushton.

Liria është përgjegjsi, zgjedhje, është frymëmarrje. Liria është detyra më e vështirë që do të keni në jetë për veten tuaj dhe mësimi që askush nuk do t'ua japë dot, sepse është terësisht në ndërgjegjen e secilit, vullnetin dhe zgjedhjet që bëni çdo ditë dhe janë zgjedhjet që t'ju japin lumturinë.

Prandaj nëse ia vlen të ktheheni pas, bëjeni, por më parë mësoni si të jini të lirë.

HermesNews - ©2013

Dërgo me email | Stampo artikullin