13/05/2013 10:36:37

Kontrolle të vazhdueshme në doganë

Fluksi në rritje i lëvizjes së mallrave të konsumit në të dy anët e kufirit ka sjellë edhe rritjen e nivelit të kontrollit, i shtrirë gjatë 24 orëve

KUKES - Fluksi në rritje i lëvizjes së mallrave mes Shqipërisë e Kosovës ka bërë të rritet edhe kontrolli ndaj tyre me të vetmin synim, mbrojtjen e shëndetit të konsumatorit. "Fluksi në rritje i lëvizjes së mallrave të konsumit në të dy anët e kufirit ka sjellë edhe rritjen e nivelit të kontrollit, i shtrirë gjatë 24 orëve. Kjo ka bërë që të parandalohet thuajse krejtësisht hyrja në treg e mallrave në prag të skadencës, ose të skaduara", thotë drejtori i drejtorisë rajonale të Autoritetit Kombëtar të Ushqimit, Bilbil Myftari.

Në këtë periudhë vemendja është përqëndruar në kontrollin e mallrave si, miell, djath, sallamra etj, që cdo ditë futen me shumicë nga Kosova në tregun shqiptar. Mesatarisht çdo ditë futen nga Kosova në Shqipëri mbi 30 mjete me mallra të ndryshëm ushqimorë drejt tregut shqiptar.

"Çdo ngarkesë me mallra ushqimore që futet në territorin shqiptar kontrollohet nga inspektorët tanë që janë të pranishëm në mjediset e doganës gjatë 24 orëve", thotë Myftari. Sipas tij, "...gjatë periudhës Janar - Prill janë asgjësuar mbi 5 kv mallra ushqimore të skaduara, nga rreth 3,5 kv mallra të asgjësuara gjatë së njëjtës periudhë të vitit të kaluar. Rritja e sasisë së mallrave të asgjësuara, është tregues i rritjes së cilësisë së kontrollit, gjë që ka sjellë që gjatë 10 ditëshit të parë të muajit maj të mos shënohet asnjë rast i ardhjes së mallrave afër afatit të skadencës", saktësoi ai.

Sipas tij, "...një gjë e tillë është rrjedhojë dhe e bashkëpunimit me strukturat e kontrollit të mallrave ushqimore në doganën e Vërmicës (Kosovë). Bashkëpunimi i dyanshëm ka sjellë edhe mirëkuptimin e vetë tregtarëve e drejtuesve të mjeteve, gjë që është me përfitim të dyanshëm, edhe për drejtuesit e mjeteve edhe për punonjësit kontrollorë".

Në doganën e Morinit janë 6 inspektorë, prej të cilëve 2 veterinerë, 2 teknologë dhe 2 agronomë për kontrollin gjatë 24 orëve të mallrave ushqimore që lëvizin në të dy anët e kufirit.

HermesNews - ©2013

Dërgo me email | Stampo artikullin