11/05/2013 18:15:20

Maksi operacion antidroge në Vlorë

900 kg drogë u sekuestruan nga policia e Vlorës gjatë dy ditëve operacion

VLORE - Policia e Vlorës bllokoi dhe sekuestroi gjatë dy operacioneve 900 kg lëndë narkotike të llojit marijuanë, ndërkohë që është shkatërruar një bazë për përpunimin dhe paketimin e tyre.

Gjatë kontrollit të një banese në fshatin Sherrishtë, 7 km në lindje të qytetit, u gjetën dhe sekuestruan 300 kg marijuanë, e cila ishte paketuar dhe vendosur në çanta të ndryshme.

Nga hetimet rezultoi se, pronari i banesës, 50 vjeçari Festim Sadedinaj, e grumbullonte dhe e paketonte lëndën narkotike për llogari të grupeve të ndryshme kriminale.

Në cilësinë e provës materiale këtij personi iu sekuestruan 2 automjete tip furgon dhe kamionçinë, të cilat përdoreshin për transportimin e lëndës narkotike,si dhe një peshore elektronike.

Gjithashtu, uniformat blu të Vlorës bllokuan gjatë një operacioni 600 kg lëndë narkotike të llojit marijuanë, si dhe prangosën 2 persona të dyshuar, mes të cilëve, Diego Haxhiraj 27 vjeç dhe Ajet Çepaj, 51 vjeç, të dy banorë të këtij qyteti.

Lënda narkotike, që është sekuestruar brenda një automjeti tip kamionçinë frigoriferike në një parking në qytet, dyshohet se do të trafikohej drejt Italisë. Gjatë këtij viti, policia lokale ka bllokuar gjithsej 3 tonë lëndë narkotike të llojit marijuanë, gjatë 10 operacioneve antidrogë.

HermesNews - ©2013

Dërgo me email | Stampo artikullin