10/05/2013 15:13:34

Lista Koço - Edi: të majtët e akuzojnë 'na la mënjanë'

Islami, 'në kohën kur Rama dhe Koço ndanin tenderat, socialistët e thjeshtë dhe xhenuin, ata të ndershmit vazhdonin të mbronin Ramën me vetmohim, pa e kuptuar se në këtë mënyrë pa dashje kishim ndihmuar të mbushej thesi i Koço Kokëdhimës'

TIRANË - Deputeti i pavarur, Kastriot Islami dënoi sot modelin që po ofron kreu i Partisë Socialiste, Edi Rama duke lënë mënjanë figurat e shquara të kësaj partie dhe duke kandiduar për deputet atin e tij shpirtëror, Koço Kokëdhimën.

Sipas Islamit, “mbrëmë shqiptarët dhe veçanërisht të majtët, panë me zë dhe me figurë urrejtjen patologjike të liderit shpirtëror të Edi Ramës për PS-në dhe njëkohësisht dashurinë e tij për OMGJ-t, madje brenda kësaj partie më konkretiksht për modelin Koço- Edi”.

“Gjatë gjithë qeverisjes së Edi Ramës, shtoi deputeti Islami, “Koço Kokëdhima ka marrë jo pak, por 19 milionë dollarë ose 19 miliardë lekë tendera. Keni së bashku me deklaratën që shpërndava edhe një listë të tenderave që ka marrë Kokëdhima nga Rama që ndryshe do ta quaja lista Koço - Edi si aksionerë të modelit Edi - Koço. Më thoni të dashur qytetarë kush nga socialistët e thjeshtë ka marrë qoftë edhe një tender të vogël 1 milionësh nga Edi Rama. Askush sepse të gjithë tenderat i ka marrë Koço edhe ato të mëdhatë 1 miliardshet edhe ato të voglat 1 milionshet”.

Siç e shikoni, tha Islami, “në kohën kur Rama dhe Koço ndanin tenderat, socialistët e thjeshtë dhe xhenuin, ata të ndershmit vazhdonin të mbronin Ramën me vetmohim, pa e kuptuar se në këtë mënyrë pa dashje kishim ndihmuar të mbushej thesi i Koço Kokëdhimës. Kishim ndihmuar qe modeli Edi-Koço të forcohoj brenda PS-së dhe të vinte dita pastaj që të gjithë sociaistët e ndershëm të pastroheshin. Ryshfetet dhe përfitimet personale dhe materiale ja kanë bllokuar logjikën edhe të birit edhe të atit të PS-së. Tashmë, të kthyer në një sekt tërësisht klientelistë, në modelin e lidhjes biznes – politikë- media, modeli Edi – Koço”.

“Në këtë situatë, shtoi deputeti Islami, “vendimi i këtij sekti klientelistë për të ardhur në pushtet, për të rrjepur dhe për të futur në thesin e Koços dhe Edit, të gjithë Shqipërinë nuk është më thjesht një detyrë e socialistëve të vërtetë e të ndershëm, por është një detyre kombëtare. Në vitin 2011 modeli Edi - Koço doli nga Tirana, pra doli nga dera dhe në 23 qershor nuk do të ketë asnjë shans të futet nga dritarja. Ndoshta do të përpiqet të futet nga oxhaku, por do të dalë më i nxirë sesa ç’është në realitet”.

HermesNews - ©2013

Dërgo me email | Stampo artikullin