10/05/2013 15:04:54

Paralajmërimi i Bankës për reforma strukturore të vendeve

BERZH parashikon rënie për vendet ku ajo punon, veçanërisht për Rusinë dhe vendet Arabe

STAMBOLL - Banka Europiane për Rindërtim dhe Zhvillim (BERZH) rishikoi sot në ulje parashikimet për rritjen ekonomike për vitin 2013 për vendet në të cilat ajo operon, veçanërisht Rusia dhe demokracitë e reja arabe si Egjipti.

Në të gjithë vendet e Europës Lindore, Azisë Qendrore dhe Mesdheut Jugor, ku ajo operon, BERZH parashikon aktualisht një rritje ekonomike prej 2,2 për qind këtë vit, më pak se 3,1 për qind të parashikuar në janar.

"Arsyet e ngadalësimit të rritjes ekonomike ndryshojnë sipas vendeve, por kjo shërben si paralajmërim për këto rajone që të rrisin vrullin e reformave strukturore", deklaroi Erik Berglof, kryeekonomisti i institucionit.

"Përgjegjësia buxhetore është shumë e rëndësishme. Por shumica e vendeve tona tashmë kanë bërë përparime të konsiderueshme në këtë fushë gjatë krizës. E rëndësishme sot është progresi i reformave strukturore", theksoi ai.

Ndikimi i krizës në eurozonë, është aktualisht më i ulët, por ekonomi të tilla si Rusia, Polonia dhe Turqia përjetuan një ngadalësim, që ndihet edhe përtej kufijve të tyre.

HermesNews - ©2013

Dërgo me email | Stampo artikullin