09/05/2013 11:15:58

Bizneset më tepër nëpër banka

Në kuadrin e vlerësimit të përdorimit të instrumenteve të pagesave, për periudhën shkurt-mars 2012 Banka Qendrore ka kryer një anketim me 400 biznese në zonën Tiranë-Durrës

TIRANE - Banka e Shqipërisë vëren se biznesi vendas është familjarizuar me instrumentat e sistemit bankar dhe po rrit gjithnjë e më shumë përdorimin e tyre, duke reduktuar përdorimin e parasë CASH dhe kontribuar në formalizimin e treguesve ekonomikë.

Në kuadrin e vlerësimit të përdorimit të instrumenteve të pagesave, për periudhën shkurt-mars 2012 Banka Qendrore ka kryer një anketim me 400 biznese në zonën Tiranë-Durrës, ku është dhe përqendrimi kryesor i bizneseve dhe i transaksioneve bankare.

Analizimi i rezultateve dhe karakteristikave të evidentuara gjatë përpunimit të të dhënave të anketimit të bizneseve sugjerojnë se instrumentet e pagesave më të pranuar nga bizneset (përveç kartës së debitit apo kreditit, që ishin kusht fillestar në realizimin e zgjedhjes së bizneseve), janë edhe "transferta e kreditit", që zë 40.57 %.

Pesha relativisht e lartë e përdorimit të këtij instrumenti është në përputhje me pritjet e BSH-së, pasi ky lloj instrumenti, për vetë natyrën e tij, mund të konsiderohet si një instrument më shumë i përdorur në transaksionet e bizneseve krahasuar me ato të individëve.

"Debitimi direkt" zë 25.71 % të transaksioneve, ndërkohë që pranimi i "çekut" me 14.39 % dhe "e-banking" me 13.21 % konfirmon peshat e ulëta, të cilat zënë këto lloj instrumentesh ndaj totalit të instrumenteve, sipas raportimeve të bankave pranë Bankës së Shqipërisë.

Banka, nisur edhe nga përvoja ndërkombëtare, vëren se në tregun shqiptar madhësia e biznesit dhe të ardhurat e tij janë faktorë domethënës në pranimin dhe përdorimin e instrumenteve elektronikë të pagesave.

Në përmbushje të përgjegjësisë së saj ligjore në fushën e sistemit të pagesave, Banka e Shqipërisë nxit funksionimin normal të sistemeve të pagesave me qëllim mbështetjen e implementimit të politikës monetare, ruajtjen e stabilitetit financiar si dhe të besueshmërisë së publikut në monedhën kombëtare.

Për arritjen e këtij objektivi Banka e Shqipërisë është e përfshirë në tre role të ndryshme: atë operacional, mbikëqyrës dhe katalizator të sistemeve të pagesave. Sipas Kushtetutës së Republikës së Shqipërisë, Banka e Shqipërisë është autoriteti i vetëm përgjegjës për emetimin dhe qarkullimin e monedhës kombëtare, lekut.

HermesNews - ©2013

Dërgo me email | Stampo artikullin