09/05/2013 11:12:42

Athina kërkesë Shkupit për emrin

Avramopulos: do të pranojmë emër me përcaktim të qartë gjeografik, titulli i artikujve nëpër mediat greke

ATHINË- Athina zyrtare i kërkoi Shkupit, gjatë takimit të djeshëm mes ministrit grek të Punëve të Jashtme, Dhimitris Avramopulos dhe zëvendëskryeministrit të Maqedonisë për Çështjet Europiane, Fatmir Besimi, pranimin e një emri me përcaktim të qartë gjeografik, njoftoi sot media greke.

"Avramopulos: do të pranojmë emër me përcaktim të qartë gjeografik" është titulli pothuajse në të gjithë median greke, që arijnë në përfundimin se zgjidhja e çështjes për emrin është kusht për Maqedoninë që të fillojë negociatat me BE-në.

"Avramopulos e bëri këtë pas takimit me zëvendëskryeministrin Besimi duke theksuar se marrëdhëniet e fqinjësisë së mirë dhe zgjidhja e mosmarrëveshjeve për emrin janë kushte për kursin euroatlantik të Maqedonisë", komenton televizioni shtetëror grek, ERT.

Duke mos hequr dorë nga përvoja e deritanishme, Athina zyrtare edhe këtë herë shfrytëzoi ta theksojë "konstruktivitetin" e saj duke thënë se "Greqia çdoherë ka qenë urë midis të gjithë fqinjëve të saj dhe Evropës" dhe se "kjo është parë në qëndrimin e saj të fuqishëm dhe rolin e saj vital dhe stabilizues".

Opinionit grek i është transmetuar edhe konstatimi i Avramopulos se "fakti që ekzistojnë probleme nuk do të thotë se nuk bisedojmë për punët". "Përkundrazi, takime të tilla janë veçanërisht të dobishme dhe konstruktive, sepse ata formojnë, krijojnë, konsolidojnë klimë, atmosferë të besimit në marrëdhëniet tona", deklaroi Avramopulos duke përkujtuar se është takuar me Besimin kur të dy kanë qenë ministra të Mbrojtjes.

HermesNews - ©2013

Dërgo me email | Stampo artikullin