08/05/2013 16:19:12

Bumçi, ngjarja e shëmtuar: Velaj, nuk ka patuar asnjë incident

Rama refozoi të japë shpjegime rreth ngjarjes

TIRANË - Ministri i Jashtëm, Aldo Bumçi, e cilësoi "një ngjarje të rëndë dhe të paprecedentë që dëmton imazhin e vendit", incidentin e ndodhur më 24 prill në Akademinë e Vjenës, mes kryetarit të PS-së, Edi Rama dhe diplomatit shqiptar, Egin Ceka.

I thirrur nga komisioni parlamentar, Bumçi tha se,"Ngjarja, është akoma më e rëndë pasi në të është përfshirë kryetari i opozitës, i cili ka ushtruar dhunë mbi diplomatin shqiptar. Ngjarja është e paprecedentë dhe ka dëmtuar rëndë imazhin e Shqipërisë", theksoi ministri i Jashtëm.

Ai vlerësoi figurën e diplomatit Egin Ceka, i cili tha ai do i bënte nder çdo trupe diplomatike të çdo vendi europian.

Në mbledhjen e sotme të komisionit hetimor dha versionin e tij për incidentin e 24 prillit edhe një nga organizatorët e takimit në Vjenë, artisti Fate Velaj. Sipas tij, në Akademinë e Vjenës nuk ka pasur asnjë incident mes diplomatit Ceka e kryetarit të PS-së, Rama.

"Takimi ishte mëse korrekt dhe normal dhe nuk ka pasur incident. Akademia Diplomatike ka deklaruar se nuk ka pasur incident dhe atëherë jeni ju që po prishni imazhin", iu drejtua ai anëtarëve të komisionit hetimor.

Komisioni për hetimin e fakteve dhe përgjegjësive për incidentin e ndodhur në Akademinë e Vjenës, mes z. Rama dhe diplomatit Ceka, u mblodh të mërkurën për të dëgjuar dëshmitë e dy protagonistëve të kësaj ngjarje.

Mbledhja nisi me dëshminë e diplomatit shqiptar, i cili pasi përshkroi me hollësi dinamikën e incidentit dhe rrethanat si u zhvillua ai, deklaroi dorëheqjen e parevokueshme nga detyra e nëpunësit diplomatik në Vjenë.

Në seancën e sotme dëgjimore dëshmoi dhe ambasadori shqiptar në Vjenë Vili Minarolli. Ndërsa kryetari i PS, Edi Rama, nuk u paraqit në komision, pasi refuzoi të japë shpjegime rreth ngjarjes.

HermesNews - ©2013

Dërgo me email | Stampo artikullin