08/05/2013 10:49:45

Protesta e grave për listat 'diskriminuese' të zgjedhjeve

Shoqatat protestojnë për numrin e pakët të grave në listat e votimit

DURRES - Shoqata e Grave me Probleme Sociale me qendër në Durrës ka reaguar sot lidhur me numrin e ulët të vajzave dhe grave, të pranishme në listat e koalicioneve dhe partive që do të garojnë në zgjedhjet e 23 qershorit. Përmes një njoftimi për shtyp, drejtuesit e shoqatës bëjnë me dije se përfaqësimi i ulët i grave përbën një regres në përpjekjet e përbashkëta për të emancipuar politikën dhe për të shfrytëzuar potencialet e mëdha profesionale, njerëzore dhe politike që gratë zotërojnë.

"Nga shqyrtimi i listave përfundimtare të kandidatëve në qarkun e Durrësit, vëmë re që ka munguar vullneti politik për të zbatuar kuotën e parashikuar në ligj mbi përfaqësimin gjinor të kandidateve, jo vetëm në drejtim të numrit të grave, por edhe renditjes së tyre në lista", nënvizon njoftimi i shpërndarë sot për mediat në Durrës. Diskriminimi gjinor që bëhet në këtë rast, reflekton ngërçin e një politike që nuk di të kapërcejë vetveten, të zbatojë ligjet, të respektojë demokracinë dhe të aplikojë mundësi të barabarta përtej gjinisë, në funksion të interesit publik, nënvizon Shoqata e Grave me Probleme Sociale.

Në listën e paraqitur nga PD në qarkun e Durrësit konkurojnë 4 kandidate gra dhe vajza, ndër 14 kandidatura, ndërsa në listat e PS janë vetëm dy. Kodi Zgjedhor parashikon përfaqësimin me 30 për qind të grave dhe vajzave.

HermesNews - ©2013

Dërgo me email | Stampo artikullin