03/05/2013 14:38:08

Vlore. Ndalohen tre trafikante

Trafikonin droge nga Shqiperia ne Itali

VLORE- Policia e Vlorës arrestoi sot 3 persona, të dyshuar si pjesëtarë të një grupi trafiku të lëndëve narkotike nga Shqipëria drejt Italisë, për një periudhe 1 vjeçare, në vlera të mëdha financiare.

Burime zyrtare të Policisë lokale bënë të ditur se Bexhet Aliaj, 43 vjeç, nga Vlora, Dritan Kaçani, 42 vjeç dhe Shpëtim Shehu, 22 vjeç, banues në fshatin Zvërnec, u arrestuan gjatë një operacioni të uniformave blu, pas një hetimi më shumë se një vjeçar, të realizuar në bashkëpunim me Prokurorinë e Krimeve të Rënda.

"Nga veprimet e deritanishme hetimore, të realizuara në harkun kohor të një viti, rezultoi se tre të arrestuarit janë përfshirë drejtpërsëdrejt në një aktivitet kriminal, me tendencë trafikimin e narkotikëve nga Shqipëria në drejtim të Italisë", thanë burimet policore. Në të paktën katër raste, tentativat e tyre për të trafikuar lëndë narkotike në sasi të mëdha drejt Italisë, janë bllokuar, duke u sekuestruar rreth 1.7 tonë marijuanë, 2 mjete lundruese, si dhe duke arrestuar 3 persona të tjerë, të përfshirë në trafikun e drogës.

Sipas informacioneve të drejtësisë italiane, këtij grupi i janë sekuestruar edhe 4 ngarkesa të tjera me sasi të konsiderueshme marihuane, ndërsa në total, sasia e drogës së sekuestruar në Shqipëri dhe Itali kap vlerën e rreth 10 milionë eurove./m.sh

HermesNews-©2013

Dërgo me email | Stampo artikullin