02/05/2013 09:32:04

Kina ndëshkon David Cameron për takimin me Dalai Lamën

Cameron anulloi vizitën e tij në Republikën popullore të Kinës, që ishte programuar në fillim të këtij muaji, për arsye se kjo e fundit nuk e priti mirë takimin e tij me Dalai Lamën

PEKIN - David Cameron është ndëshkuar nga Kina për faktin se u takua majin e shkuar me Dalai Lamën, leaderin shpirtëror të tibetanëve.
Siç bën të ditur The Guardian, Cameron anulloi vizitën e tij në Republikën popullore të Kinës, që ishte programuar në fillim të këtij muaji, për arsye se kjo e fundit nuk e priti mirë takimin e tij me Dalai Lamën.

Si rrjedhojë Cameron-it iu parandaluan disa takime zyrtare shumë të rëndësishme, që zakonisht mbahen me të gjithë leaderat e shteteve që bëjnë pjesë në G8. Leaderit britanik, i cili e ka vizituar vetëm një herë para dy vjetësh Pekinin zyrtar, tani i duhet të presë vjeshtën për takimin e ardhshëm.

Fillimisht u mor si shpjegim për ngjarjet vështirësia për të organizuar vizitën gjatë proçesit të tranzicionit në krye të Republikës popullore, që u mbyll në mars.

Por shtypit anglez nuk i ka shpëtuar një detaj i rëndësishëm: fakti që Cameron-i e anulloi vizitën në ditët që presidenti francez Francois Hollande vizitoi Kinën, ku u nënshkruan 18 marrëveshje, ndër të cilat një mbi nuklearin dhe një për furnizimin e 60 Airbus-ve me një vlerë prej 8 milion dollarësh.

Gjatë kësaj vizite nuk kanë munguar edhe divergjencat mbi tutelën e të drejtave njerëzore dhe mbi faktin se Francës i kërkohet të respektojë interesat e kinezëve, edhe pse janë dy vende me sisteme politike krejt të ndryshme.

Në rastin e Cameronit vërehet ajo që një studim i universitetit gjerman të Gotinga-s e quajti “Efekti Dalai Lama” ose më mirë pasojat negative në fushën e marrëdhënjeve tregtare mes Kinës dhe vendeve europiane që kanë pranuar vizitën e leaderit tibetan, me motivacion mbështetjen e kërkesave të tibetanëve për autonomi dhe liri fetare kundër pushtimit kinez të Tibetit, ndaj të cilit edhe 110 tibetanë kanë protestuar duke u vetëflijuar si shenjë proteste ekstreme.

Nuk është hera e parë që Pekini zyrtar ndërmerr të tilla masa bojkotimi, sic mund të kujtohet rasti i Norvegjisë që i dha cmimin Nobel për paqe disidentit Liu Xiabo, duke komprometuar marrëdhëniet mes dy vendeve, të cilat së fundmi janë afruar sërish falë ambicjeve kineze për të kontrolluar dhe shfrytëzuar pasuritë natyrore të Arktikut.

Daniela Vathi

Dërgo me email | Stampo artikullin