27/04/2013 18:04:49

Toponimet, qytetarët në Greqi do lëvizin lehtësisht për Pashkë

Dy policitë kufitare fqinje ranë dakord dhe firmosën në Janinë (Greqi) marrëveshjen e mirëkuptimit

KAKAVIJE - Emigrantët shqiptarë që nuk qarkullojnë dot në te dyja anët e kufirit për shkak të toponimeve ne pasaporta të vendlindjes së fëmijëve të lindur në Greqi, do të ketë mundësi te udhëtojnë drejt atdheut dhe anasjelltas për të festuar Pashkët Ortodokse nëpërmjet pikës kufitare të Kakavijës gjatë dy javëve të ardhshme të muaj maj.

Kjo u be e ditur nga Drejtoria Rajonale e Kufirit dhe Migracionit për qarkun e Gjirokastrës.

"Dy policitë kufitare fqinje ranë dakord dhe firmosën në Janinë (Greqi) marrëveshjen e mirëkuptimit”, tha Admir Abrija, drejtori i policisë kufitare. Sipas tij, fëmijët e lindur në Greqi, të cilët kanë probleme me toponimet në dokumentat e tyre, nga data e sotme deri më 12 maj, mund të udhëtojnë të lirë drejt vendlindjes dhe anasjelltas nëpërmjet pikës kufitare të Kakavijes.

“Pas datës 12 maj, asnjë emigrant që ka probleme me toponime në pasaportë nuk do të lejohet të hyjë në territorin grek”, saktësoi Abrija. Në prefekturën e qarkut të Gjirokastrës, në kufirin Shqipëri-Greqi, funksionojnë me kohë të plotë dy pika vendkalimi kufitar, ajo e Kakavije, që ndodhet rreth 25 kilometra larg qytetit të Gjirokastrës, në drejtim të jugut dhe “Tre Urat”, që ndodhet rreth 22 kilometra larg qytetit të Përmetit, në drejtim të perëndimit. Ndërsa pikat kufitare e Sopikut, që ndodhet rreth 50 kilometra larg qytetit të Gjirokastrës, në komunën e Pogonit, funksionon vetëm për këmbësorët.

HermesNews - ©2013

Dërgo me email | Stampo artikullin