26/04/2013 09:35:47

Qytetarët rrisin sigurimet vullnetare

AMF informon se gjatë periudhës Janar-Mars, në portofolet e pronës, përgjegjësive, garancive, u siguruan rreth 508 milionë lekë të ardhura në total

TIRANE - Shqiptarët e siguruar kanë rritur kujdesin për sigurimet vullnetare në pronë, garanci, shendet, etj, por vendin e parë e zënë sigurimet ndaj zjarrit.

AMF informon se gjatë periudhës Janar-Mars, në portofolet e pronës, përgjegjësive, garancive, u siguruan rreth 508 milionë lekë të ardhura në total. Vendin e parë e zunë zjarri dhe dëmtime të tjera në pronë me rreth 75.99%, të pasuara nga sigurimi i përgjegjësive të përgjithshme civile, me rreth 17.57% të totalit.

Në portofolin 'sigurimi nga zjarri dhe forcat e natyrës', gjatë periudhës janar-mars u vu re rritje me 73.34% të volumit të primeve të shkruara bruto, e shoqëruar dhe me rritjen 9.80% të numrit të kontratave të sigurimit, krahasuar me të njëjtën periudhë të vitit të kaluar.

Primet e sigurimit vullnetar arritën rreth 1,050 milionë lekë ose 2.76% më shumë se në periudhën janar-mars 2012. Sigurimet vullnetare të Jo-Jetës gjatë kësaj periudhe u rritën me rreth 1.99% kundrejt të njëjtës periudhë të vitit 2012.

Të ardhurat nga sigurimet e aksidenteve dhe shëndetit gjatë periudhës janar-mars arritën rreth 151 milionë lekë, me një rritje 2.68% në krahasim me periudhën janar-mars 2012. Peshën më të madhe të të ardhurave të këtij grupi e mbajtën sigurimi i sëmundjeve me 52.17% të totalit.

Primet nga Sigurimi i Jetës gjatë 3-mujorit të parë të këtij viti arritën në rreth 248 milionë lekë, me një rritje prej 5.31% më shumë se në të njëjtën periudhë të vitit të kaluar.

Në 3 muajt e parë sivjet vërehet se pagesat e dëmeve u ulën me rreth 17.68% krahasuar me të njëjtën periudhë të vitit të kaluar. Pjesa më e madhe e dëmeve të paguara bruto i takojnë sigurimit motorik me rreth 499 milionë lekë, apo 84.13% të totalit të dëmeve të paguara bruto.


　

HermesNews - ©2013

Dërgo me email | Stampo artikullin