26/04/2013 09:29:30

Rriten të ardhurat në tregun e sigurimeve

Sipas Autoritetit të Mbikëqyrjes Financiare (AMF), gjatë periudhës janar-mars numri i kontratave të sigurimit të lidhura arriti në 232,784, me një rritje 6.36% më shumë, krahasuar me të njëjtën periudhë të një viti më parë

TIRANE - Të ardhurat nga primet e shkruara bruto të sigurimit për periudhën janar-mars arritën rreth 2,085 milionë lekë ose 11.96% më shumë se në të njëjtën periudhë të 2012-tës.

Sipas Autoritetit të Mbikëqyrjes Financiare (AMF), gjatë periudhës janar-mars numri i kontratave të sigurimit të lidhura arriti në 232,784, me një rritje 6.36% më shumë, krahasuar me të njëjtën periudhë të një viti më parë.

Tregu vazhdoi të mbetet sërish i orientuar tek sigurimet e Jo-Jetës, të cilat sollën rreth 87.61% të vëllimit të përgjithshëm të primeve, ndërsa Sigurimet e Jetës me 11.90% dhe Risigurimi me 0.49%.

Sipas ndarjes së tregut në bazë të llojit të sigurimit të detyrueshëm dhe vullnetar, primet e shkruara bruto të sigurimit vullnetar zënë 50.62% dhe primet e shkruara bruto të sigurimit të detyrueshëm zënë 49.38% të totalit të tregut.

Gjatë periudhës janar-mars dëmet e paguara bruto në tregun e sigurimeve arritën në rreth 593 milionë lekë ose 17.68% më pak se e njëjta periudhë e vitit 2012.

Primet e sigurimit të detyrueshëm motorik në periudhën janar-mars arritën rreth 1,024 milionë lekë, ose rreth 21.92% më shumë se e njëjta periudhë e vitit 2012.

Produkti MTPL e brendshme në periudhën janar-mars u rrit me 25.95% ndaj volumit të primeve të shkruara bruto, ndërsa numri i kontratave u rrit me 50.46% krahasuar me periudhën janar-mars 2012.

Produkti Sigurim Kufitar në këtë periudhë pësoi një ulje 2.04% të volumit të primeve të shkruara bruto dhe numri i kontratave u ul me rreth 30.20%, krahasuar me periudhën janar-mars 2012. Volumi i primeve të shkruara bruto të produktit Karton Jeshil në periudhën janar-mars u rrit me 15.80% krahasuar me të njëjtën periudhë të vitit 2012 dhe numri i kontratave u rrit 12.47%.

HermesNews - ©2013

Dërgo me email | Stampo artikullin