25/04/2013 18:48:12

Vetëflijohen tre tibetanë

Episodet vdekjeprurëse kanë ndodhur në perfekturën e Abas, që është pjesë e provincës jug-perëndimore të Sichuan-it

DHRAMSHALA (Indi) - Radio free Asia në Dharamsala, qyteza ku ndodhet qeveria tibetane në mërgim, bën të ditur se kanë ndodhur tre raste të tjera vetëflijimi nga qytetarë me etni tibetane, të cilët protestojnë për aneksimin e vendlindjes së tyre nga Republica Popullore e Kinës dhe kërkojnë rikthimin e Dalai Lamës, liderit tibetan.

Tre episodet vdekjeprurëse kanë ndodhur në perfekturën e Abas, që është pjesë e provincës jug-perëndimore të Sichuan-it dhe është kufitare me Tibet-in.

Dy nga viktimat, që i dhanë vetes flakë në manastirin e Taktsang Lhamo Kirti, ishin murgjit budist: Lobsang Dawa, 20 vjec, dhe Konchog Woeser, 22 vjec. Ndërsa viktima e tretë ishte një grua 23 vjecare, rrethanat e së cilës janë ende të panjohura.

Autoritetet kineze, të cilat janë shprehur se nuk ishin në dijeni të ngjarjeve, kanë urdhëruar djegjen e menjëhershme të trupave të viktimave me qëllim për të shmangur protestat masive me rastin e varrimit.

Shkon tashmë në 117 numri i qytetarëve tibetan, të cilët nga viti 2009 kanë zgjedhur këtë mënyrë vetëflijimi për të protestuar kundër Kinës dhe në pjesën më të madhe të rasteve kanë vdekur nga djegiet e rënda që kanë pësuar. //HermesNews - ©2013//

Daniela Vathi

Dërgo me email | Stampo artikullin