25/04/2013 10:34:59

Koalicionet në garën elektorale të 23 Qershorit

Dy forcat e mëdha politike në vend, PD dhe PS regjistruan zyrtarisht në Komisionin Qendror të Zgjedhjeve listën e partive sipas koalicioneve respektivë

TIRANË - Dy koalicione zgjedhore do të konkurrojnë në zgjedhjet parlamentare të 23 qershorit, "Aleanca për Punësim, Mirëqenie dhe Integrim" dhe "Aleanca për Shqipërinë Europiane", të drejtuara respektivisht nga Partia Demokratike dhe Partia Socialiste.

Dy forcat e mëdha politike në vend, PD dhe PS regjistruan zyrtarisht në Komisionin Qendror të Zgjedhjeve listën e partive sipas koalicioneve respektivë.

Koalicioni i djathtë, i udhëhequr nga PD, nën emrin "Aleanca për Punësim, Mirëqenie dhe Integrim", përbëhet nga 26 parti të vogla, të djathta dhe të qendrës.

Ndërsa koalicioni i kryesuar nga PS, nën emrin "Aleanca për Shqipërinë Europiane", përfshin 40 parti. Dy partitë e reja në skenën politike shqiptare "Fryma e Re Demokratike" dhe "Aleanca Kuq e Zi" do të konkurrojnë të vetme në zgjedhje, duke i ofruar elektoratit shqiptar një alternativë të tretë.

Sistemi proporcional rajonal, që aplikohet në Shqipëri, favorizon aleancat e gjera dhe kjo u provua me zgjedhjet e 2009-s. Në zgjedhjet e fundit parlamentare konkuruan katër koalicione zgjedhore.

"Aleanca e Ndryshimit" ishte formacioni më i madh, i përbërë nga 10 parti të djathta; koalicioni i majtë "Bashkimi për ndryshim", përbëhej nga 5 parti; ndërsa Aleanca "Poli i Lirisë" dhe "Aleanca Socialiste për Integrim", grupuan secila nga 6 parti.

HermesNews - ©2013

Dërgo me email | Stampo artikullin