23/04/2013 18:26:14

Italia falimenton këtë vjeshtë

Grillo: 'nga shtatori dhe tetori, shteti nuk do të ketë më para dhe kjo do ta bëjë më të vështirë për të paguar pagat dhe pensionet'

BERLIN - Beppe Grillo, kreu i lëvizjes "5 yjet", që fitoi rreth një të katërtën e votave në zgjedhjet e përgjithshme parlamentare të muajit shkurt, dha një intervistë turbulluese për të përditshmen gjermane "Bild" duke deklaruar se shteti italian do të përballet me falimentimin këtë vjeshtë dhe se do të mirëpriste çdo lloj ndërhyrjeje nga shteti gjerman.

"Nga shtatori dhe tetori, shteti nuk do të ketë më para dhe kjo do ta bëjë më të vështirë për të paguar pagat dhe pensionet", deklaroi Grillo. "Tridhjetë deputetë italianë, të dënuar për krime të rënda, kanë zënë vende në parlament", vazhdoi Grillo.

"Do të më pëlqente të kisha njerëz profesionistë, të ndershëm dhe të aftë në postet e duhura. Në këtë lloj situate, do të më lumturonte më shumë pushtimi gjerman i Italisë", tha Grillo.

"Rizgjedhja e Giorgio Napolitanos është e njëjtë me një grusht të poshtër shteti", deklaroi Grillo duke folur për presidentin italian 87-vjeçar, i cili u rizgjodh dje.

"Situata nuk është zbavitëse. Në Itali ka shumë njerëz të zemëruar. Ne duhet ta kontrollojmë këtë irritim", deklaroi Grillo.

Grillo e quajti "të kapitulluar" kreun e qendrës së djathtë dhe ish-kryeministrin Berlusconi dhe u ankua se biznesi i vogël dhe i mesëm në Itali "po falimentonte".

HermesNews - ©2013

Dërgo me email | Stampo artikullin