23/04/2013 17:10:26

Arrestohet i akuzuari për vrasje në Itali

Sipas njoftimit për shtyp të lëshuar nga Policia e Shtetit Shqiptar, ky shtetas akuzohet se më datë 12 dhjetor 2012, në Komunën Quarrata të Pistojës në shtetin italian, bashkëpunim me shtetasit Bledar Haxhillari dhe Fatjon Kraja, ka vrarë Priftin e Kishës Tizzana e Catena

TIRANË - Policia shqiptare në bashkëpunim me misionin INTERFORZE të policisë italiane në Shqipëri, në kuadër të operacionit ndërkombëtar të koduar “PISTOIA”, arrestuan shtetasin, Gazmor Bashkim Haxhillari, 35 vjeç, banues në Cërrik, i akuzuar për vrasje në Itali.

Sipas njoftimit për shtyp të lëshuar nga Policia e Shtetit Shqiptar, ky shtetas akuzohet se më datë 12 dhjetor 2012, në Komunën Quarrata të Pistojës në shtetin italian, bashkëpunim me shtetasit Bledar Haxhillari dhe Fatjon Kraja, ka vrarë Priftin e Kishës Tizzana e Catena, don Mario del Becaro.

I arrestuari Gazmor Haxhillari ka një sërë precedentësh të rëndë kriminal për veprat penale të vjedhjes dhe grabitjes të kryera në shtetin italian. Operacioni, në kuadër të të cilit u bë arrestimi i këtij shtetasi, është zhvilluar njëkohësisht në Shqipëri dhe në Itali nga shërbimet policore tëdy vendeve, duke bërë të mundur arrestimin e tre autorëve të këtij krimit të rëndë.

Për zbardhjen e kësaj ngjarje të rëndë të ndodhur në shtetin italian, nga Drejtoria Kundër Krimeve të Rënda në Policinë e Shtetit dhe Zyra Qendrore Kombëtare Interpol Tirana, është bashkëpunuar ngushtë dhe shkëmbyer informacion i vazhdueshëm me Misionin Italian INTERFORZE dhe autoritetet policore italiane.

Në këtë kuadër janë kryer verifikime për një periudhë rreth 2 mujore në qytetet e Elbasanit dhe Durrësit, duke bërë të mundur dokumentimin e plotë të autorësisë së saj, si dhe kapjen e tre autorëve të këtij krimi. Kurorëzimi me sukses i këtij operacioni dëshmon edhe një herë më së miri nivelin e lartë të bashkëpunimit ndërmjet strukturave policore të dy vendeve.

HermesNews - ©2013

Dërgo me email | Stampo artikullin