23/04/2013 16:36:05

Anëtarin i ri i KZAZ-së e propozon partia Republikane

Kërkesa vjen pas vendimit të LSI-së, për largimin nga grupi i partive që i përkasin shumicës parlamentare,

TIRANË - Komisioni Qendror i Zgjedhjeve pranoi pjesërisht të martën kërkesën e Partisë Republikane, që si parti e dytë e shumicës parlamentare, të jetë ajo forca politike që ka të drejtë të paraqesë propozime për anëtar në Komisionet Zonale të Administrimit Zgjedhor (KZAZ).

Kjo kërkesë e PR-së, vjen pas vendimit të LSI-së, e cila deklaroi largimin nga grupi i partive që i përkasin shumicës parlamentare, gjë që ndryshoi dhe renditjen e forcave politike, sipas numrit të mandateve të fituara në zgjedhjet e fundit (2009).

Pas PD-së, partitë që i përkasin grupit të partive të shumicës parlamentare, janë PR dhe PDIU. Këto dy parti kanë numër të njëjtë mandatesh, por numri i votave të fituara prej tyre është i ndryshëm.

Sipas rezultatit përfundimtar të zgjedhjeve të vitit 2009, rezulton se PR ka fituar në shkallë vendi 31.990 vota dhe PDIU ka fituar 14.477 vota. Ky rezultat e nxjerr PR-në parti e dytë e shumicës parlamentare, së cilës, sipas ligjit, i lind e drejta të paraqesë propozime për anëtarë në KZAZ.

Diskutimi i këtij akti u shoqërua me debate, pasi ekspertët ligjorë të opozitës pranë KQZ-së e kundërshtuan atë, pasi sipas tyre, "cënon barazpeshën politike në komisionet e nivelit të dytë'.

Juristët Genci Gjonçaj i PS-së dhe Ylli Manjani i LSI-së kërkuan nga Komisioni që ta rishikojë aktin, se bie ndesh me vendimin e KQZ-së të 7 janarit 2013 "Për caktimin e partive politike që kanë të drejtë të paraqesin propozime për anëtarë të KZAZ-ve, për zgjedhjet e 23 qershorit".

Por, kryetarja e KQZ-së, Lefterije Lleshi, tha se kërkesa e PR-së është marrë tashmë në shqyrtim nga Komisioni dhe është e bazuar në kodin zgjedhor. "KQZ tashmë e ka të konturuar vendimin e tij, që i referohet nenit 29 të kodit për 'përbërjen e KZAZ-ve", tha ajo.

Para miratimit të aktit me votat e katër anëtarëve të KQZ-së të pranishëm në mbledhje, dy juristët e partive të opozitës braktisën mbledhjen në shenjë proteste ndaj vendimit në fjalë.

HermesNews - ©2013

Dërgo me email | Stampo artikullin