17/04/2013 09:26:57

KQZ njofton Kuvendin për vendet bosh

Pas dorëheqjes së nënkryetarit të KQZ-së, sot anëtarja e PS-së Albana Shtylla dha dorëheqjen

(15:00) Komisioni qendror i zgjedhjeve njoftoi sot zyrtarisht Kuvendin e Shqipërisë për dy vakancat e krijuara në institucionin zgjedhor, pas dorëheqjeve të njëpasnjëshme të dy komisionerëve të propozuar nga opozita parlamentare.

Të martën në mbrëmje u dorëhoq nga detyra e zv/kryetarit të KQZ-së, Denar Biba, ndërsa paraditen e sotme u tërhoq anëtarja tjetër, Albana Shtylla.
Dorëheqjet e dy komisionerëve vijnë në reagim të vendimit të Kuvendit për lirimin nga detyra të anëtarit të KQZ-së, Ilirian Muho, i propozuar nga LSI.

Sipas nenit 19, pika 3 të kodit zgjedhor në rast se mandati i një anëtari të KQZ-së përfundon para kohe gjatë periudhës së zgjedhjeve, ai zëvendësohet nga Kuvendi sa më shpejt që të jetë e mundur, por jo më vonë se 48 orë nga krijimi i vakancës.

(11:47) Anëtarja e Komisionit Qendror të Zgjedhjeve e propozuar nga PS, Albana Shtylla dhe dorëheqjen për të njëjtat arsye për cilat dha dorëheqjen një ditë më parë, anëtari tjetër i PS, Denar Biba.

Dorëheqja e Shtyllës është paraqitur vetëm pak orë pasi Biba u tërhoq nga detyra e anëtarit dhe nënkryetarit të KQZ-së. “Akti i Kuvendit me shkarkimin e Muhos ka cenuar rëndë pavarësinë e cdo anëtari të KQZ”, tha Shtylla.


TIRANE - Nënkryetari i KQZ-së, Denar Biba dha dorëheqjen nga posti pasi e quan "cënim të institucioneve të pavarura të shtetit" shkarkimin e anëtarit të LSI-së nga KQZ Ilirjan Muho. Dorëheqja e tij është e parevokueshme.

Brenda 48 orëve pritet të dalë kandidati i ri që do të zëvendësojë postin e lënë bosh nga Denar Biba. Aktualisht LSI ka përfaqësuesit e saj në komisionet e niveleve të dyta dhe të treta.

Do t'i japin socialistët një mandat LSI-së ?

Ish Ambasadori amerikan në Tiranë John L. Withers, i njohur për kritikat e tij post diplomatike ndaj K/ministrit Berisha, e quan aktin "manipulim të zgjedhjeve" dhe një "shqetësim real i bazuar, pasi Berisha ka emëruar dhelprat e tij besnike si roje te koteci i zgjedhjeve".

Drejtori për Euroazinë në Departamentin amerikan të shtetit, Jonathan Moore, mbërrin sot në Tiranë në një vizitë të shpejtë pas ngjarjeve të fundit në KQZ. //HermesNews - ©2013//

Doriana Metollari

Dërgo me email | Stampo artikullin