16/04/2013 17:10:51

Çamët, zbatoni rezolutën

PDIU, komunitetit çam t’i njihen dhe jepen të gjithë të drejtat sipas Konventës europiane të lirive dhe të drejtave të njeriut

TIRANË - PDIU-ja, duke e konsideruar të miratuar rezolutën çame, referuar hetimeve të zhvilluara nga administrata e Kuvendit, kërkoi sot zbatimin e çdo pike të përmbajtjes së saj, menjëherë pas publikimit në fletoren zyrtyare.

Nëpërmjet një konferencë për shtyp të ish drejtuesit të shoqatës Çamëria, PDIU-ja kërkon që "komunitetit çam t’i njihen dhe jepen të gjithë të drejtat sipas Konventës europiane të lirive dhe të drejtave të njeriut, si katalogu më i plotë i lirive dhe i të drejtave të njeriut që lidhen me kërkesat tona si e drejta e shtetësisë, e mosdiskriminimit, e pronës".

Një tjetër pikë shumë e rëndësishme e kësaj rezolute është shfuqizimi i ligjit të luftës dhe heqja e sekuestros konservative mbi pasuritë e shqiptarëve në përgjithësi dhe çamëve në veçanti.

Duke kthyer në vëmendje datën 8 prill 2004 kur rezoluta çame realisht kishte marrë mbështetjen e maxhorancës parlamentare, në deklaratë thuhet : "Se ç’ka ndodhur atë ditë, si dhe pse u mor ai vendim për ta quajtur të rrëzuar dhe pse u zbulua pikërisht sot se ajo rezolutë është miratuar, ne nuk e dimë dhe ngelemi në pritje të sqarimeve të hollësishme. Ne mbajmë mend se atë ditë luftuam shumë që ajo rezolutë të miratohej. Disa nga ne përfunduan dhe në qeli, disa u përgjakën. Nëse do kujtojmë atë ditë, atëherë ne duhet të ndihemi të lumtur që ia dolëm në përpjekjet tona dhe që ai tekst quhet sot i miratuar. Kjo rezolutë përbën një gur të rëndësishëm kilometrik drej destinacionit tonë final, vënien në vend të një padrejtësie historike", përfundon deklarata.

HermesNews - ©2013

Dërgo me email | Stampo artikullin