10/04/2013 16:39:38

Sondazhi nxjerr fituese Merkel

47 për qind e zgjedhësve do të jepnin votat e tyre për partitë CDU/CSU (konservatorët) dhe FDP, rezultati më i mirë i tyre i përbashkët që prej fundit të vitit 2009

BERLIN - Koalicioni qeveritar që grupon konservatorët e Angela Merkelit dhe liberalët e FDP-së rezulton fitues në zgjedhjet legjislative gjermane që do të zhvillohen në muajin shtator, për herë të parë që prej më shumë se tre vjetësh, sipas një sondazhi nga instituti ''Forsa'', publikuar sot.

Sipas këtij sondazhi, rreth 47 për qind e zgjedhësve do të jepnin votat e tyre për partitë CDU/CSU (konservatorët) dhe FDP, rezultati më i mirë i tyre i përbashkët që prej fundit të vitit 2009.

Në anën tjetër të spektrit politik, socialdemokratët e SPD, të gjelbërit dhe e majta radikale ''Die Linke'' morën vetëm 46 për qind të votave, që do t'i siguronte maxhorancës aktuale, drejtuar nga Merkel, mbajtjen e pushtetit.

Sipas sondazhit Forsa, 41 për qind (+1 pikë në raport me javën e shkuar) të personave të pyetur shprehen të gatshëm të votojnë konservatorët dhe gjashtë për qind për liberalët (+ 1 pikë gjithashtu).

SPD vazhdon të regjistrojë një rënie të lehtë dhe mori vetëm 23 për qind (-1) të votave dhe duket e eklipsuar nga fushata dëshpëruese e kandidatit të saj, Peer Steinbrück, kritikuar në shtypin gjerman për gafat e tij të përsëritura.

Të gjelbërit kanë humbur një pikë duke marrë 14 për qind të votave, ndërkohë që e majta radikale ''Die Linke'' mori nëntë për qind të votave (+1 për qind) dhe Partia e Piratëve mori tre për qind, një moment i konsideruar si një e papritur potenciale për zgjedhjet e ardhshme, pranë ragut prej pesë për qind për të hyrë në Parlament.

Ky sondazh u realizua nga 2 deri më 5 prill nga instituti ''Forsa'' për revistën Stern dhe RTL.

HermesNews - ©2013

Dërgo me email | Stampo artikullin