10/04/2013 16:19:43

KQZ mblidhet për riformatimin e strukturës

Largimi i LSI-së, një javë më parë nga koalicioni me PD-në dhe bashkimi i saj me PS-në ka shtuar polemikat lidhur me riformatimin e Komisionit Qendror të Zgjedhjeve

TIRANË - Komisioni parlamentar i Ligjeve është mbledhur mesditën e sotme për të diskutuar një propozim të grupit parlamentar të Partisë Demokratike "për lirimin nga detyra të një anëtari të KQZ-së".

Kërkesa e kryetarit të grupit të PD-së, Astrit Patozi, që i drejtohet kryetares së Kuvendit, Jozefina Topalli, kërkon që anëtari i propozuar nga LSI në Komisionin Zgjedhor, Ilirjan Muho të lirohet nga detyra me qëllim baraspeshimin politik në këtë institucion, pas largimit të kësaj force politike nga qeverisja. Për këtë qëllim, grupi parlamentar i maxhorancës shprehet për nisjen pa vonesë të procedurave të zëvendësimit të tij.

Mbledhja e sotme e komisionit të Ligjeve vjen pas një kërkese që Partia Republikane ka bërë për kalimin e anëtarit të KQZ-së nga LSI tek kjo forcë politike, si partia e dytë e maxhorancës.

Ndërkohë, kërkesat e PD dhe PR për rikonfigurimin e KQZ-së, LSI i cilësoi sot "të papajtueshme me ligjin". Nënkryetari i LSI-së, Ylli Manjani, në një deklaratë për mediat tha se "PR dhe PD kanë papajtueshmëri në atë që kërkojnë. KQZ është ndërtuar mbi bazën e një kodi zgjedhor konsensual, anëtarët e KQZ-së janë emëruar në bazë të kodit dhe shkarkohen po sipas tij dhe këtu nuk ka të bëjë politika".

Ndaj kësaj situate reagoi dhe kryetari i PS-së, Edi Rama i cili tha se kërkesa e maxhorancës për të liruar nga detyra anëtarin e LSI-së në KQZ, pas kalimit të saj nga qeverisja në opozitë, është antikushtetuese.

HermesNews - ©2013

Dërgo me email | Stampo artikullin