09/04/2013 19:26:58

Aksidenti i Himarës: studentët kërkojnë dëmshpërblim

'Kërkojmë mbështetjen morale që e drejta jonë të vihet në vend'

ELBASAN - Studentet e mbijetuara nga aksidenti tragjik i 21 Majit të një viti më parë, ku mbetën të vdekur 11 studente, drejtuesi i autobuzit si dhe i fejuari i njërës nga studentet, dolën në një konferencë për shtyp duke u shprehur të indinjuara për mosmarrjen e dëmshpërblimit nga ana e kompanisë Sigma.

"Ne kërkojmë që kompania qe ka për detyrë të na dëmshpërbleje financiarisht, duhet të permbushe detyrimet ligjore të përcaktuara në ligj. U bënë 11 muaj nga ngjarja dhe ende ne po sorrollatemi pa marrë një përgjigje. Duhet të dijë i gjithë opinioni publik se shëndeti ynë është ende me probleme dhe familjet tona nuk mund t'i përballojnë dot shpenzimet", tha e mbijetuara Blerina Cerçani.

Studentët thonë se Qeveria shqiptare i ka dhënë paratë e dëmshpërblimit për 11 familjet e viktimave si edhe për studentet e dëmtuara, por kompania Sigma ende hesht.

Në 21 maj të një viti më parë, si pasojë e një aksidenti tragjik në Himarë, humbën jetën 11 studente të degës Gjuhë - Letërsi, qe ishin nisur për ekspeditë, ndërsa 26 të mbijetuarit morën plagë të rënda në këtë aksident tragjik.

HermesNews - ©2013

Dërgo me email | Stampo artikullin