04/04/2013 18:11:38

Vlora rrit prodhimin e drithërave

Në Qarkun e Vlorës numërohen 29031 ferma bujqësore të orientuara në kultivimin e bimëve të arave

VLORE - Gjatë tre viteve të fundit, prodhimi i drithërave të bukës, veçanërisht i grurit, në Qarkun e Vlorës ka shënuar rritje të vazhdueshme. Mirela Koçi, drejtoreshë Ekzekutive e Agjencisë së Zhvillimit Ekonomik Lokal (AULEDA), duke ju referuar të dhënave të një studimi thotë se, kjo është rrjedhojë e disa faktorëve, ku përfshihen, struktura e fermave bujqësore dhe rritja e interesimit të fermerëve për këto kultura.

Në Qarkun e Vlorës numërohen 29031 ferma bujqësore të orientuara në kultivimin e bimëve të arave, ku rezultojnë 174605 parcela bujqësore të mbjella me bimë të kësaj kategorie, ndërkohë që në 23287 rezultojnë si aktivitete të përziera me bimë arash dhe blegtori, 25102 në pemtari etj.

Kështu, gjatë vitit të kaluar, vetëm në rrethin e Vlorës u prodhuan gjithsej 16110 tonë drithra, nga të cilat pjesën më të madhe e zinin gruri dhe misri respektivisht me 9410 dhe 5100 tonë, ndërkohë që në vitin 2008 sasia e përgjithshme e grurit arriti në 6100 tonë. Në një analizë më të detajuar, krahasuar me vitin 2008 prodhimi i grurit pothuajse është dyfishuar, çka është rrjedhojë e rritjes së interesit të fermerëve për këtë kulturë bujqësore.

Nga ana tjetër, gjatë vitit 2012 në rrethin e Vlorës u mbollën gjithsej 3886 hektarë me drithra, nga të cilat 2091 hektarë me grurë, 930 hektarë me misër dhe pjesa tjetër kultura të tjera nga kjo familje. Kjo u shoqërua edhe me rritje të konsiderueshme të rendimentit, nga të cilat prodhimi i grurit shënoi një tregues mesatar prej 45 kv/ha, ndërsa ai i misrit 54.8 kv/ha. Në total, në shkallë qarku, duke përfshirë edhe rrethet Sarandë e Delvinë, u mbollën 6349 hektarë me drithra buke, kryesisht me grurë dhe misër me një sasi të përgjithshme prej 43091 tonë, nga të cilat 9957 tonë grurë.

Po ashtu, rezultojnë të dhëna interesante edhe në zëra të tjerë, siç është kultivimi dhe prodhimi i perimeve, veçanërisht nga serat. Rendimenti dhe sasia e përgjithshme e prodhimit nga serat kanë tregues shumë më të mirë krahasuar me perimet e fushës. Kështu, rendimenti mesatar që sigurohet nga serat është rreth 650 kv/hektar, ndërkohë që për perimet e fushës ky tregues është rreth 3.5 herë më i ulët.

Mjaft fermerë vlonjatë po e orientojnë prodhimin e perimeve drejt serave. Kjo për shkak të leverdisë ekonomike që ka kjo praktikë. Aktualisht, në shkallë qarku serat zënë një sipërfaqe të përgjithshme prej 18.14 hektarësh, nga 11 hektarë që është kjo sipërfaqe për rrethin e Vlorës. Nga ana tjetër, në krahasim me vitin 2005, sipërfaqja e serave për qarkun dhe rrethin e Vlorës, rezulton të jetë rritur me pothuajse dy herë. Aktualisht, në qarkun e Vlorës prodhohen gjithsej 35152 tonë perime në vit, nga të cilat 1564 tonë sigurohen nga serat. Mes tyre vendin kryesor e zenë domatet dhe më pak, trangujt, sallata, spinaqi, barbunjat.

Studimi i mësipërm është pjesë e projektit "Miniaturization Technology" (Sinergjitë e kërkimit dhe inovacionit për të rritur zhvillimin ekonomik te Adriatikut, IPATECH), pjesë e thirrjes së dytë të IPA Adriatic Cross-border Cooperation, në programin e financimeve 2007- 2013 të Bashkimit Evropian. Ky projekt synon, mes të tjerash, zhvillimin e qëndrueshëm të subjekteve në sektorin agroushqimor, ofrimin e teknologjive të reja dhe realizimin e produkteve të garantuara e më cilësi të lartë, në zona të ndryshme të vendit dhe të rajonit, ku përfshihet edhe Vlora.

Gjithashtu, përmes tij synohet forcimi i kërkimeve dhe risive te kompetencave në sektorin agroushqimor, në mënyrë që të kontribuojnë në konkurrencën dhe rritjen e qëndrueshmërisë ekonomike të bizneseve, të vendosura në zonën e bashkëpunimit, që operojnë në këtë sektor, veçanërisht mikro bizneset dhe ndërmarrjet e vogla rurale. Në rajonin e përfshirë në këtë projekt, do të përmirësohen niveli i bashkëpunimit dhe kërkimeve në sektorin agroushqimor, si dhe do të realizohet transferimi i teknologjive dhe shkëmbimi i përvojave më të mira.

Në këtë projekt, që shtrihet në një hapësirë të gjerë rajonale, me përfaqësues nga Shqipëria, Bosnje Hercegovina, Kroacia, Italia, Greqia, etj, vlerësohet me rëndësi të veçantë krijimi i një rrjeti ndërkombëtar ndërmjet sipërmarrësve, instituteve kërkimore dhe institucioneve, për të përcaktuar strategjitë e përbashkëta për marrëveshje më të mirë me tregjet dhe produktet e globalizimit. Ndërkohë, do të jetë objektiv kryesor nevoja për të prodhuar produkte agroushqimore të sigurta dhe të cilësisë së lartë, mbrojtja e mjedisit gjatë proceseve të prodhimit dhe të përpunimit, qasja në risi nga përdoruesit final, kryesisht bizneset mikro dhe bizneset e vogla rurale.

Gjatë 30 muajve janë planifikuar dhe do të zhvillohen një sërë aktivitetesh në zonat pilot, siç janë analizat e fokusuara në sektorin agroushqimor dhe në teknologjitë e përdorura kryesisht në zonat e përfshira në projekt, evidentimi i praktikave më të mira dhe zonave të ekselencës për të lehtësuar transferimin e përvojave, krijimi i mjeteve të nevojshme për të shpërndarë në mënyrë efektive informacionet e marra me teknologjitë në dispozicion. Po ashtu, do të realizohet krijimi i 3 qendrave agroushqimore të risive, për të lehtësuar afrimin e teknologjive të reja. Ndërkohë, me mjaft rëndësi vlerësohet eksperimentimi i planifikuar, i cili do të zbatohet nga të gjithë partnerët, me makineri që punojnë me burimet e ripërtëritshme të energjisë dhe të aftë për të përpunuar produkte të sigurta dhe me cilësi të mirë.

HermesNews - ©2013

Dërgo me email | Stampo artikullin