02/04/2013 10:41:46

LSI kthen faqe: zyrtarizohet bashkëpunimi me socialistët

'E ftoj drejtperdrejte dhe publikisht LSI-ne. Largimi nga qeveria eshte pranuar dhe nga Berisha... te vije ne koalicion parazgjedhor me PS-ne...sot duhet bashkim dhe vullnet per nje faqe te re me LSI-ne'

(18:00) "Partia Lëvizja Socialiste për Integrim largohet nga qeveria për të “rrëmbyer” votat e së majtës duke i kaluar sërisht në kampin tjetër", tha sot në një konferencë për shtyp, Kreu i Partisë Social-Demokrate, Skënder Gjinushi.

Sipas tij, “LSI e PD e kanë të qartë se së bashku nuk mund të fitojnë zgjedhjet, prandaj LSI po largohet nga Qeveria dhe kërkon të hyjë në koalicionin e majtë duke evituar kështu humbjen, gjë të cilën ne e kishim paralajmëruar gati një muaj e gjysëm përpara”.

(14:00) Kreu i PS-se Edi Rama deklaroi sot bashkimin me LSI-ne. "...e ftoj drejtperdrejte dhe publikisht LSI-ne. Largimi nga qeveria eshte pranuar dhe nga Berisha... te vije ne koalicion parazgjedhor me PS-ne...sot duhet bashkim dhe vullnet per nje faqe te re me LSI-ne".

(12:20) Kryesia e PS-se zyrtarizon ftesen per koalicion me LSI-ne ne zgjedhjet e 23 Qershorit. Pas pak pritet dhe mbledhja e grupit parlamentar socialist.

(12:00) Partia Socialiste pritet të zhvillojë në ambientet e selisë së saj, mbledhjen e kryesisë. Siç bëhet e ditur nga burimet mediatike, temë kryesore e kësaj mbledhjeje pritet të jetë çështja e aleancës me Lëvizjen Socialiste për Integrim, kur kjo e fundit duket se do ndërpresë bashkëpunimin me qeverinë aktuale. Ende nuk ka një ofertë zyrtare të PS-së për LSI-në, por kreu i grupit parlamentar Lefter Koka, tha dje se nuk përjashtohet bashkëpunimi parazgjedhor me socialistët.

(11:00) Kryetarja e Parlamentit Jozefina Topalli në lidhje me largimin e LSI-së nga qeveria Berisha tha se respektonte "...çdo lloj vendimi të partive politike, megjithatë Edi Rama na e ka bërë Kushtetutën të fortë për të vazhduar qeverisjen dhe ne do e bëjmë edhe pas 23 qershorit".

TIRANË - "Qëndrimi im ka qenë dhe mbetet i pandryshuar se çdo force politike bën zgjedhjen që dëshiron", deklaroi sot Kryeministri Sali Berisha përmes rrjetit social Facebook, duke komentuar debatin e gjerë që është hapur së fundi lidhur me njoftimet se LSI do të vendosë të lërë qeverinë.
Kryeministri siguroi se për të, qeveria dhe qeverisja janë përgjegjësi që bëhen edhe më të mëdha në periudhë elektorale."Me këtë rast dua të siguroj zgjedhësit se asgjë nuk do të cënoje vendosmërinë e qeverisë për organizimin e një procesi zgjedhor të lirë dhe të ndershëm, në përputhje me Kodin Zgjedhor dhe Kushtetutën e vendit. Së dyti, dua të garantoj qytetarët se Kushtetuta e vendit ka të gjitha përcaktimet e qarta për zgjidhje plotësisht kushtetuese të çdo problemi institucional dhe se ajo do të respektohet me rigorozitet në frymën dhe gërmën e saj. Unë mbetëm totalisht i përkushtuar të punojë me të gjithë energjitë e mia, në interesin më të mirë të qytetarëve dhe të vendit", shkruan kryeministri në rrjetin e tij social Facebook.

HermesNews - ©2013

Dërgo me email | Stampo artikullin