29/03/2013 16:05:33

Tirane, arrestohet nje grup trafikantesh

Në sajë të hetimeve disa mujore intensive dhe profesionale të kryera brenda dhe jashtë vendit, rezultoi se këta shtetas në bashkëpunim me njëri-tjetrin janë të përfshirë në aktivitetin kriminal të kontrabandimit të njerëzve nga Shqipëria me destinacion Mbretërinë e Bashkuar

TIRANE - Policia e Shtetit njoftoi sot goditjen e një grupi kriminal me tendence kontrabandimin e njerëzve nga Shqiperia drejt Britanisë se Madhe.

Në një konferencë për shtyp, zëdhënësi i Policisë së Shtetit, Tefik Sulejmani deklaroi se gjatë ditës së sotme, strukturat e Departamentit kundër Krimit të Organizuar dhe Krimeve të Rënda në Policinë e Shtetit në bashkëpunim me Prokurorinë për Krime të Rënda dhe Drejtorinë e Policisë së Qarkut Tiranë, si dhe në bashkëpunim me autoritetet policore të Britanisë së Madhe finalizuan me sukses operacionin ndërkombëtar “La Manche”, në kuadër të të cilit u bë e mundur goditja e një grupi kriminal, që kryente kontrabandimin e njerëzve nga Shqipëria drejt Britanisë së Madhe.

Gjatë këtij operacioni u bë arrestimi i shtetasve: Hazir Maçi, 47 vjeç, banues në Tiranë, i dënuar më parë për veprën penale “Fallsifikim”, Shaqir Saliu, 37 vjeç , banues në Tiranë, i dënuar më parë për veprën penale “Mashtrim”, Agron Peçaku, 39 vjeç, banues në Tiranë. Nderkohë u bë shpallja në kërkim e dy shtetasve te tjerë.

Në sajë të hetimeve disa mujore intensive dhe profesionale të kryera brenda dhe jashtë vendit, rezultoi se këta shtetas në bashkëpunim me njëri-tjetrin janë të përfshirë në aktivitetin kriminal të kontrabandimit të njerëzve nga Shqipëria me destinacion Mbretërinë e Bashkuar, me qëllim përfitimi me vlerë rreth 5500 Paund për person.

Po në kuadër të këtyre hetimeve janë evidentuar edhe persona të tjerë si bashkëpunëtorë të këtyre shtetasve në këtë aktivitet të kundraligjshëm, me qëndrim në Kosove, Francë, Belgjikë, Itali dhe Britaninë e Madhe.

Gjithnjë sipas komunikatës zyrtare, për shtetasit e sipërcituar Gjykata e Shkallës së Parë për Krime të Rënda Tiranë ka caktuar masën e sigurimit “arrest me burg” për veprën penale “ndihmë për kalim të paligjshëm të kufijve e kryer në formën e grupit të strukturuar kriminal”.

Ndersa, materialet procedurale në ngarkim të këtyre shtetasve do t`i referohen Prokurorisë për Krime të Rënda për veprime të mëtejshme.

HermesNews - ©2013

Dërgo me email | Stampo artikullin