29/03/2013 12:34:03

Vlorë, rrezikojnë mbytjen dy peshkatarë

Pas një telefonate në polici, rojet bregdetare shpëtojnë dy peshkatarë

(16:00) Policia lokale bëri të ditur identitetin e peshkatarit të dytë që rrezikohet në hapësirën detare të Vlorës, prej mëngjesit të të premtes. "Gëzim Bashllari, është emri i peshkatarit të dytë që ndodhet në bordin e një mjeti të vogël lundrues së bashku me babshkëmoshatarin e tij, 25 vjeçarin, Fatmir Ismaili", thanë burime të policisë.

Dy të rinjtë kanë kërkuar ndihmë sot përmes një telefonate në Sallën Operative të Drejtorisë së Policisë Kufitare dhe Migracionit, duke u shprehur se janë në rrezik në hapësirën detare të Vlorës, 2 milje në veri të ishullit të Sazanit. Në ndihmë të tyre po zhvillohet një operacion kërkim shpëtimi, që ka nisur në orët e para të mëngjesit dhe ku janë përfshirë katër mjete lundruese dhe 2 helikopterë të Ministrisë së Mbrojtjes.

(14:00) Një anije “ARCH ANGEL” A-05 e Rojes Bregdetare të Forcave Detare është angazhuar sot në orën 07.00 në operacionin e kërkim-shpëtimit të dy peshkatarëve, që kanë humbur gjurmët në det në afërsi të Zvërnecit në Vlorë, bëri të ditur ministria e Mbrojtjes.

Anija A-05, me një ekuipazh prej katër vetë, i është bashkuar mjeteve dhe forcave të Policisë Kufitare dhe forcave të tjera që janë angazhuar në këtë operacion.

Në orën 12.55, me urdhër të Shefit të Shtabit të Përgjithshëm të FA, Gjeneral Major Xhemal Gjunkshi, në operacion u përfshi edhe helikopteri “COUGER” i Forcës Ajrore. Operacioni i kërkim-shpëtimit vijon në të gjithë hapësirën e Gjirit të Vlorës, në afërsi të Sazanit dhe Karaburunit, por deri tani ende nuk ka ndonjë gjurmë të peshkatarëve të humbur. /gj.mima/s.s./

VLORË - Dy persona, të identifikuar si peshkatarë, kanë kërkuar sot ndihmë pranë Policisë Kufitare, ku përmes një telefonate pranë sallës Operative në Drejtorinë e Policisë Kufitare të qytetit bregdetar, ata kanë bërë të ditur se ndodhen në det të hapur, në rrezik mbytjeje.

Shefi i Kapitenerisë së Portit të Vlorës, Anastas Goga, tha të premten për se, telefonata është bërë rreth orës 6.30 të mëngjesit të sotëm, në sallën Operative të Policisë Kufitare, përmes së cilës, dy peshkatarët kanë thënë se “ndodhen me një varkë të vogël, në hapsirën detare pranë ishullit të Sazanit, rreth 2 milje në veri të tij”.

Mbas kësaj telefonate, Goga pohon se është organizuar një operacion shpëtimi, ku janë përfshirë struktura të Policisë Kufitare, Rojes Bregdetare dhe Kapitenerisë së Portit të Vlorës.

“Aktualisht janë dy mjete lundruese në kërkim të tyre, në hapësirën detare mes ishullit të Sazanit dhe grykëderdhjes së lumit “Vjosa”, ndërsa për momentin nuk ka ende gjurmë të tyre dhe pse është komunikuar disa herë në telefon me ta“, tha Goga, duke bërë të ditur se vazhdon kërkimi intensive për gjetjen dhe shpëtimin e tyre, falë edhe kushteve normale për lundrimin që favorizojnë operacion e shpëtimit.

HermesNews - ©2013

Dërgo me email | Stampo artikullin