27/03/2013 17:07:25

Bashkia e Sarandës nën akuza për shpërdorim fondesh

Kryesia e PD-së së Sarandës bëri publike shkeljet, të shoqëruara edhe me imazhe të investimeve jocilësore, duke i quajtur ato si papërgjegjshmëri nga ana e departamenteve të kontrollit, në bashkinë e qytetit bregdetar

SARANDË - Dega e Partisë Demokratike e Sarandës akuzoi sot bashkinë e qytetit për shkelje të standardeve në shërbimet ndaj qytetarëve, si dhe keqpërdorimin e fondeve në investimet e kryera.

Përmes një deklarate për mediat, kryesia e PD-së së Sarandës bëri publike shkeljet, të shoqëruara edhe me imazhe të investimeve jocilësore, duke i quajtur ato si papërgjegjshmëri nga ana e departamenteve të kontrollit, në bashkinë e qytetit bregdetar.

"Thelbi i denoncimit publik të deklaratës së sotme, në fokus ka investimet e bëra në hapësirat e plazhit publik, pranë shëtitores "Hasan Tahsini", si dhe ato në rikonstruksionin e rrugës së parë të qytetit. Të gjithë jemi dëshimtarë të gjendjes në të cilën hapësirat e këtij plazhi janë katandisur plot shkëmbinj, ku dallgët e detit gëlltisin milionat e taksapaguesve sarandiotë, duke hequr të drejtën natyrore të shijes së plazhit, kësaj dhurate të zotit, që shumë kush i ka zili”, thuhet në deklaratën zyrtare të selisë blu.

Në deklaratën e sotme thuhet gjithashtu se “në programin e tij elektoral të zgjedhjeve lokale të vitit 2011, kryebashkiaku Çipa premtoi se transformimet, sipas konceptit të tij, kanë të bëjnë me rigjallërimin e identitetit në të gjitha hapësirat e Sarandës, ndërkohë që sipas degës së PD-së, faktet tregojnë se investimi po shkon në rrjedhë të kundërt me interesat e qytetarëve.

Përmes kësaj deklarate, Partia Demokratike e Sarandës bën apel për transparencë ndaj qytetarëve, lidhur me përdorimin e fondeve të bashkisë për investimet publike.

HermesNews - ©2013

Dërgo me email | Stampo artikullin