26/03/2013 10:00:42

Prangoset farmacisti Bashkim Tahiri: akuza për kontrabandë

Ilaçe të vjedhura në Itali shiteshin me çmim tregu në Tiranë. Nën hetim, grupi i trafikantëve

TIRANË - Policia prangosi dje 62 vjeçarin Bashkim Tahiri i cili dyshohet se është i përfshirë në kontrabandë ilaçesh. Sipas policisë, Tahiri shiste në treg, pasi i blinte kontrabandë medikamentet e ndryshme. Të përfshirë në hetime dhe persona të tjerë. Shtetasi Bashkim Tahiri u prangos në farmacinë që ai ka pranë Qendrës spitalore N"ënë Tereza".

Bashkim Tahiri, (babai i deputetit socialist Sajmir Tahiri), në bashkëpunim me Spartak Kokën, dyshohet se bënin pjesë në të njëjtin grup që fuste ilaçe të vjedhura nga Italia.

Historia fillonte me vjehrrën e Dritan Gjizës i arrestuar, (Nadire P.), e cila punonte në një qëndër shëndetsore në Itali, prej ku vidhte ilaçe që i dërgonte me traget në Durrës.

Gjiza ia kalonte medikamentet me një çmim të lirë Bashkim Tahirit i cili ua shiste me çmim tregu klientëve të farmacisë. Policia i kishte gjetur ilaçet ishin pa dokumentacionin përkatës.

Deputeti Tahiri, i shoqëruar nga avokati i babait të tij Plarent Ndreca, nuk u lejuan të takohen me të arrestuarin mbrëmë, për arsye proçeduriale. Ndreca u ankua publikisht për këtë veprim të policisë duke e quajtur "situatë të turpshme". Deputeti socialist Sajmir Tahiri i cili ka beteja ligjore me femijet e Kryeministrit Sali Berisha, tha se inkurajonte këdo të hetonte dhe babain e tij.

"Asnjë shtetas shqiptar nuk është mbi ligjin", deklaroi mënjeherë më pas Edi Rama, që kërkon hetim dhe gjykim të pavarur. "Fakti që bëhet fjalë për babain e deputetit socialist, nuk e bën të akuzuarin vetvetiu më të pafajshëm". Rama hedh dyshime nëse arrestimi Tahirit është hakmarrje pas përplasjeve në gjyq të djalit të tij, deputeti Saimir Tahiri, me fëmijët e kryeministrit Berisha, por kjo nuk do ta bënte gjithsesi më pak fajtor 62 vjeçarin në dy të drejtësisë.

Avokati Ndreca i cili tha se ka një prokurë nga bashkëshortja e Bashkim Tahirajt për ta mbrojtur, pretendon se është në pritje te aktit proçedural nga policia për akuzat e ngritura ndaj klientit të tij.

Doriana Metollari

Dërgo me email | Stampo artikullin