25/03/2013 12:51:26

Qipro nuk do të falimentojë

Zona Euro arrin mareveshjen per planin e shpetimit financiar

(15:10) Qeveria greke theksoi sot se marrëveshja e arritur në Bruksel mes Nikozisë, BE-së dhe FMN-së për shpëtimin e Qipros ishte ''e vështirë'', por shmang daljen e vendit nga zona euro dhe kaosi që i kanosej. "Marrëveshja që u arrit sot në mëngjes për Qipron është e vështirë por nuk lejon futjen në kaos që do të ishte si pasojë e falimentimit dhe daljes nga euro'', theksoi zëdhënësi i qeverisë greke, Simos Kédikoglou. "Tashmë është e rëndësishme të ndihmojmë Qipron të rimëkëmbet (...) me qëllim që ishulli t'i rikthehet prosperitetit dhe rritjes ekonomike'', shtoi Kedikoglou.


(15:00) Ministri gjerman i Financave, Wolfgang Schäuble tha sot se plani i shpëtimit financiar për Qipron ishte i drejtë dhe siguronte stabilizimin e situatës në Qipro. "Rezultati i negociatave është i drejtë për të gjitha palët e pjesëmarrëse'', theksoi ministri, i cili paraqiti për shtypin këtë plan të arritur në Bruksel në përfundim të negociatave të vështira dhe që parashikon mbylljen e bankës së dytë qipriote. Me zgjidhjen e arritur, Qipro ka një mundësi të mirë për të rivendosur besimin e humbur'', theksoi ministri gjerman i Financave, i cili pranoi se të arrish këtë zgjidhje ishte e ''vështirë''.


BRUKSEL - Një marrëveshje për shpëtimin e Qipros nga falimentimi u arrit në mesnatë me zonën euro dhe FMN, që parashikon humbje për kreditorët e bankës së parë në vend dhe mbylljen e bankës së dytë, konfirmoi një burim evropian.

Presidenti qipriot, Nicos Anastasiades, i cili ndodhej dje në Bruksel, u shpreh i kënaqur në përfundim të negociatave duke lënë sot në mëngjes herët Këshillin Europian.

Përmbajtja e marrëveshjes që do t'i mundësojë Qipros të shmangë falimentimin nuk u bë e ditur, por linjat e rëndësihme u bënë të ditura më parë.

Marrëveshja parashikon mbylljen e bankës ''Laïki'', e dyta në vend, sipas një burimi europian. Depozituesit e vegjël do të shpëtohen, por ata me depozita mbi 100 000 euro do të pësojnë humbje.

Sipas një burimi të tretë, marrëveshja parashikon që ''Bank of Cyprus'', e para në vend që numëron shumë depozitues rusë, të mos mbyllet, por depozituesit në këtë bankë që posedojnë shuma mbi mbi 100 000 euro, do të pësojnë humbje të konsiderueshme.

Ideja e një takse për të gjitha shpenzimet bankare, parashikuar në planin e parë, ngjalli shumë irritim. Ky plan është hedhur poshtë, sipas burimit të dytë.

Anastasiades ka zhvilluar takime me presidentët e Këshillit Evropian, Herman Van Rompuy, të Komisionit Evropian, Hosé Manuel Barroso, të Bankës Qendrore Evropiane (BQE), Mario Draghi, të Eurogrupit, Jeroen Dijsselbloem, si dhe drejtoreshën e Fondit Monetar Ndërkombëtar (FMN), Christine Lagarde.

Këto takime kanë qenë vendimtare për arritjen e një marrëveshjeje.

HermesNews - ©2013

Dërgo me email | Stampo artikullin