25/03/2013 10:48:33

Fule la jashtë politikën

Nga Gjin Musa

TIRANE - Një vizitë e paralajmëruar për një tjetër kritikë të fortë
politikës shqiptare. Stefan Fyle merr pjesë në konferencën Just BE dhe del hapur. BE është ngopur me paaftësitë e politikës shqiptare dhe del në terren për të folur me qytetarët. Kjo vizitë na kujton paralajmërimet që i erdhën Shqipërisë në 97-tën, aso kohe Berisha President i Republikës, sot Kryeministër në një vend ku demokracia ende nuk kultivohet siç duhet. Si do ndjehen politikanët kur Fule do të largohet nga Shqipëria pa asnjë takim me ta ? Një vendim i arsyeshëm nga një përfaqësues i BE-së, këshillat e të cilit asnjëherë nuk u morën parasysh. Çdo ftohje me Europën është përgjegjësi direkte e Berishës dhe Ramës, meqë këtë fushatë, europianët, e shohin si të pamoralshme nga të gjithë krahët politik. Liderët e të gjithë krahëve politik duhet të bashkëpunojnë me Europën, për të gjetur një rrugëzgjidhje dhe per të shmangur një të keqe me të madhe. Zgjedhjet në Shqipëri me një kryeministër si Berisha dhe opozitar Rama nuk do të sjellin asnjë të re për qytetarët. Kushdo e ka kuptuar dhe e sheh sa poshtë ka rënë politika shqiptare përpara faktorit ndërkombëtar. Shqipëria vlen më shumë se poltroni i pushtetit dhe Partia Socialiste e Shqipërisë mban po ashtu përgjegjësi po për këtë qeverisje. Të gjithë politikanët me pasuri marramendëse duhet t'i frikësohen drejtësisë dhe nëse pas këtij largimi të Fules, ata do të vazhdojnë të ndjekin të njëjtën rrugë të vjetër, më mirë të japin dorëheqje, sepse qytetarët integrohen dhe pa partitë në pushtet. Europa është e hapur për qytetarët dhe e mbyllur për partitë mesa duket.


* Autori është zëdhënës i Lëvizjes Pesë Yjet

HermesNews - ©2013

Dërgo me email | Stampo artikullin