23/03/2013 20:14:24

Liria e votës, duhet fituar

Nga Gjin Musa

ROME - Në Shqipëri fushata elektorale sapo i ka ndezur motorët dhe lufta sa vjen dhe ashpërsohet. Normalisht që sharjet, nga më banalet, nuk mungojnë së bashku me premtimet që vërshojnë si lumë. Secila forcë politike shpalos platformat e saj elektorale duke kërkuar të jetë superiore ndaj tjetrës.

Dy janë ato që i japin tonin politikës Shqiptare, P.D - P.S. dhe pakënaqësitë ndaj tyre vijnë gjithnjë e në rritje. Partia Demokratike paraqitet me ambicje një ndryshim rrënjësor dhe siç duket ka objektiv fshatin dhe punësimin e rinisë. 250.000 vende pune në këtë mandat të tretë, në dy mandatet e ma para pamë një rënie drastike të punësimit, një realitet të kundërt.

U premtua se do qeverisej me duar të pastra, ndodhi e kundërta. Korrupsioni
është bërë publik shumë herë në një vend me krizë politike dhe ekonomike, ende jashtë dyerve të Europës.

Shqipëria është rasti i vetëm që tre herë i refuzohet statusi si kandidate në Bashkimin Europian. Pse ?

Një qeverisje e dobët, po ashtu një opozitë që nuk diti të bëjë opozitë. Shqipëria njihet si një vend problematik, në çdo kohë ka prodhuar kriza, ka bërë zgjedhje të pa ndershme dhe të dënueshme nga ndërkombëtarët dhe pse Berisha çdo herë ka premtuar që do jemi shëmbull në zgjedhjet lokale apo kombëtare.

Po çfarë do sjellin kësaj here premtimet ?

Partia Socialiste premton 300.000 vende pune, rënde dhe drejtësi e shtet. Po cila do të jetë rruga që do të ndjekë për ta mbajtur këtë premtim ?

Ekonomia është në krizë totale, rendi dhe qetësia na kujtojnë një kohë të zymtë atë të 97-tës, shteti është peng i pushtetit, drejtësia peng i politikës.

Të premtosh për të marrë pushtet është e lehtë, po të realizosh premtimet është tjetër gjë. Në këto 22 vjet as të djathtët dhe as të majtët nuk mbajtën as 10% të premtimeve.

Populli jeton me shpresën për një ditë më të mirë, po e mira duket shumë larg, e gati e pa arritëshme. Shkodra dhe shumë rrethe të tjera përmbyten sa herë bie shi, 22 vjet që nuk është prekur sistemi vadites dhe kullues.

Zonat malore në Shqipëri i ngjajnë një mesjete të vërtetë, shkolla dhe qendra shëndetësore e shkatërruara, flasim për jetën më për jetën ?

Bankat boshatisur, borxhi i jashtëm ka arritur shifra tronditëse, rrugët e ndërtuara në këto tetë vjet sa vinë dhe degradohen nga punë pa cilësi. Falë Zotit dhe punës së emigrantëve Shqipëria është gjallë.

Po është për t'u habitur se asnjëri krah politik nuk e ka ditur t'i trajtojë emigrantët. Një nëpërkëmbje e pa toleruesheme, jemi vetëm në Greqi dhe Itali mbi 1 miljon e 600.000 emigrantë.

Qeveritë as kujtohen se ka nënshtetas të vet pa të drejtë vote e përfaqësimi në pushtetin lokal e deri në sallën e parlamentit. Kjo flet qartë dhe prerë së forcat politike në Shqipëri janë të prirura për interesat e ngushta jo për çështjet kardinale që ka vendi.

Unë disa here e kam trajtuar problemin e qytetarëve shqiptarë jashë. Kemi inteligjencën e mirëfilltë, djemtë dhe vajzat tona janë diplomuar në universitetet më në zë të Europës. Por, duhen punësuar dhe ata që mbarojnë universitete me "diploma të blera". Më dhëmb kur e mendoj. Kush është ai shqiptar që beson se këto forca politike do e nxjerrin vendin nga kriza e rëndë që përjeton ?

Habitem kur dëgjoj që LSI bën premtime pas skandaleve që pati ?

Mospërfshirja në elektorat e votave të qytetarëve jashtë, është shenjë jo e mirë për demokracinë Shqiptare. Në Tiranë gati çdo ditë ulen politikanë të Europës që kërkojnë të zbusin gjakrat për lirinë e votës së popullit.

Kështu na do Europa, po ne a e duam për veten tonë këtë ?


* Autori është zëdhënës i "Lëvizjes 5 Yjet"

HermesNews - ©2013

Dërgo me email | Stampo artikullin